Putin: Rusia është e gatshme t'u shesë aleatëve armë të avancuara
Presidenti rus Vladimir Putin deklaroi se Moska është e gatshme t'u shesë armë të avancuara aleatëve të saj në mbarë botën dhe të bashkëpunojë në zhvillimin e teknologjisë ushtarake, ndërsa lufta midis Rusisë dhe Ukrainës po i afrohet muajit të gjashtë.
Duke iu drejtuar forumit ndërkombëtar ushtarak-teknik Army-2022, i cili zhvillohet në Qendrën e Kongresit Patriotik dhe Ekspozitave në periferi të Moskës, Putin këmbënguli se armatimet ruse janë vite përpara konkurrencës. Rusia i vlerëson lidhjet e saj të forta me Amerikën Latine, Azinë dhe Afrikën, “dhe është e gatshme t'u ofrojë partnerëve dhe aleatëve llojet më moderne të armëve - nga armët e vogla te automjetet e blinduara dhe artileria, avionët luftarakë dhe mjetet ajrore pa pilot”, tha të hënën udhëheqësi rus, duke shtuar se "pothuajse të gjitha armët janë përdorur më shumë se një herë në operacione të vërteta luftarake". Putin tha gjithashtu se Rusia mund të ofrojë modele dhe sisteme të reja, duke thënë: "Ne po flasim për armë dhe robotikë me precizion të lartë, për sisteme luftarake të bazuara në parime të reja fizike". Ai tha se shumë prej armëve ruse “janë vite, ose ndoshta dekada përpara rivalëve të tyre të huaj, dhe për sa i përket karakteristikave taktike dhe teknike ato janë dukshëm më superiore ndaj tyre”. Putin tha gjithashtu se forcat ruse dhe aleatët e tyre në rajonin e Donbasit po përmbushnin të gjitha detyrat e tyre. “Hap pas hapi ata po çlirojnë tokën e Donbasit”. Putin deklaroi gjithashtu se Moska “vlerëson shumë faktin që ka shumë aleatë dhe partnerë të besueshëm në kontinente të ndryshme. Këto janë shtetet që nuk i nënshtrohen të ashtuquajturit hegjemonizëm, liderët e tyre tregojnë një karakter të vërtetë burrëror dhe nuk përkulen”, tha Presidenti rus.
