Perspektiva e grevës së përgjithshme mbulon Britaninë

Më shumë linja të udhëtimit janë bllokuar ndërsa dhjetëra mijëra punëtorë hekurudhorë në të gjithë Britaninë po protestojnë.

Të përfaqësuar nga sindikata e punëtorëve RMT, prej muajsh ata kanë kërkuar nga qeveria kushte më të mira pune dhe rritje të pagës së tyre në përputhje me inflacionin dyshifror. Qeveria britanike thotë se rritja e pagave është e papërballueshme dhe ka premtuar veprime të ashpra kundër sindikatave. Sindikatat thonë se po qëndrojnë të patundura në kërkesat e tyre. Grevat kanë një kosto për ekonominë për sa i përket ditëve të humbura të punës dhe mediat e krahut të djathtë në Britani e kanë llogaritur këtë kosto. Instituti i Çështjeve Ekonomike Britanike ka vlerësuar se greva e sektorëve publikë në këtë vend, për ekonominë britanike kushton 300 milionë paund në ditë dhe dëmi i saj është po aq sa gjatë shpërthimit të Koronës. Grevat që janë mbajtur në Britaninë e Madhe muajt e fundit i kanë kushtuar ekonomisë së vendit 750 milionë paund dhe sipas përllogaritjeve, greva e punëtorëve të rrjetit hekurudhor britanik ka dëmtuar industrinë me 1.5 miliardë paund. Megjithatë, kjo nuk duket se ka dëmtuar mbështetjen publike për grevistët. Kostoja e jetesës po rritet, kështu që ata duhet të kenë një rritje pagash. Greva e punëtorëve hekurudhorë vjen mes një krize të kostos së jetesës që ka parë që çmimet e ushqimit dhe energjisë të rriten në nivelet më të larta të 40 viteve të fundit që nga fillimi i luftës në Ukrainë, duke shtyrë miliona britanikë në varfëri. Në një situatë ku kërcimi i paprecedentë i indeksit të inflacionit dhe rritja e madhe e kostos së jetesës e kanë vënë këtë vend në kushtet më të këqija ekonomike të gjysmëshekullit të kaluar, qeveria britanike ka përdorur sistemin e uljes së shpenzimeve për mirëqenien publike, përfshirë ato në shëndetësi. Stafi i Shërbimit Shëndetësor Kombëtar të goditur nga kriza, NHS, gjithashtu ka hyrë në grevë këtë javë për herë të parë në më shumë se 100 vjet. Dhe numri i sektorëve që i bashkohen valës së grevave është në rritje. Mund të mos shohim një grevë të përgjithshme në kuptimin tradicional, por siç po shkojnë gjërat, ka të ngjarë që sindikatat e ndryshme të sinkronizojnë dhe koordinojnë veprimet e tyre për të maksimalizuar ndikimin e tyre për një marrëveshje më të mirë me qeverinë.