Bullgaria ka furnizuar fshehurazi Ukrainën me karburant dhe municione

Bullgaria, në kundërshtim me qëndrimet e saj publike që u treguan në favor të Rusisë, në muajt e parë të luftës furnizoi fshehurazi Ukrainën me karburant dhe municione.

Botimi gjerman "De Welt" raportoi të mërkurën se qeveria e Bullgarisë, në kundërshtim me qëndrimin zyrtar të Sofjes, në pranverë ka dërguar sasi të mëdha municioni dhe naftë në Ukrainë. Bullgaria është i vetmi vend anëtar i BE-së që nuk ka dërguar publikisht armë dhe municione në Ukrainë. Në prill 2022, ish-kryeministri bullgar Kirill Petkov, pasi vizitoi Kievin, njoftoi gatishmërinë e Sofjes për të riparuar vetëm pajisjet ushtarake të dëmtuara të Ukrainës. Bullgaria, një nga anëtarët më të varfër të Bashkimit Evropian dhe që shihet prej kohësh si pro-Moskës, e ndihmoi Ukrainën t'i mbijetonte sulmit fillestar rus duke furnizuar fshehurazi këtë vend me sasi të mëdha nafte dhe municionesh.  Ish-kryeministri bullgar Kirill Petkov dhe ministri i financave Asen Vasilev thanë se vendi i tyre pranverën e kaluar gjatë një periudhe kritike tre mujore siguroi 30 për qind të municionit të nevojshëm për ushtrinë ukrainase dhe 40 për qind të naftës.  Sipas Guardian, këto municione janë dërguar me fluturime mallrash në një aeroport në Poloni afër kufirit me Ukrainën.  Bullgaria eksportonte fshehurazi naftë për në Ukrainë dhe në këtë mënyrë furnizonte deri në 40% të nevojave të tankeve dhe automjeteve ushtarake të këtij vendi.