India ka humbur 26 pika patrullimi pas konfliktit me Kinën
Një raport i ri ka zbuluar se forcat indiane të sigurisë humbën 26 nga 65 pikat e patrullimit në rajonin Ladakh Lindor në mes të një përplasjeje të vazhdueshme me armikun e përhershëm të Indisë, Kinën, përgjatë kufirit të diskutueshëm prej 3,500 km të Himalajeve.
Lajmi u bë i ditur në një dokument kërkimor të dorëzuar në Konferencën vjetore të Drejtorit të Përgjithshëm të Policisë indiane në kryeqytetin Nju Delhi javën e kaluar. "Aktualisht ka 65 PP (Pika patrullimi) të cilat duhet të patrullohen rregullisht nga Forcat e Sigurisë Indiane. Nga 65 PP, prania jonë në 26 PP ka humbur”, tha një oficer i lartë i policisë indiane, emri i të cilit nuk u përmend. Raporti, i botuar fillimisht në gazetën Hindu, thotë se Kina e ka detyruar Indinë të pranojë se këto zona tani kanë një prani kineze dhe ka kufizuar praninë e forcave indiane të sigurisë. "Kjo çon në një zhvendosje të kufirit nën kontrollin e palës indiane dhe krijon një 'zonë tampon', çka përfundimisht çon në humbjen e kontrollit mbi këto zona nga India. Kjo taktikë e ushtrisë kineze për të rrëmbyer tokën centimetër pas centimetri njihet si 'prerja e sallamit', tha zyrtari i lartë i policisë indiane. Raporti ishte një nga 15 raportet e paraqitura nga oficerët e policisë me temën "Çështjet e sigurisë në lidhje me kufirin tokësor të Indisë". Ai tha se mungesa e patrullimit në këto PP kishte ofruar një mundësi për ushtrinë kineze për t'i pushtuar ato.
