Kolapsi i bankave amerikane trondit institucionet financiare globale

Falimentimi i bankave amerikane ka shkaktuar lëvizje drastike në aksionet e bankave, pasi investitorët kanë frikë nga ndikimet në institucionet financiare, pavarësisht garancive nga presidenti amerikan Joe Biden.

Aksionet e bankave amerikane ranë në një situatë kaotike që rrjedh nga kolapsi i Silicon Valley Bank të premten, pasi klientët kërkuan depozitat e tyre dhe aksionet e kompanisë ranë mes shqetësimeve për shëndetin financiar të bankës. Banka e fokusuar në teknologji u mbyll nga rregullatorët menjëherë pasi banka Silvergate me bazë në Kaliforni, e fokusuar në kriptovalutë, njoftoi falimentimin e saj në fillim të javës së kaluar. Më vonë, Signature Bank me bazë në Nju Jork u mbyll gjatë fundjavës për shkak të shqetësimeve për likuiditetin e huadhënësve. Valët tronditëse nga kolapsi i bankave, shkaktuan lëvizje të mëdha në aksionet e bankave të martën, ndërsa investitorët shqetësohen për shanset e dështimit financiar të më shumë bankave amerikane. Analistët thanë se shqetësimet e investitorëve për infektimin e mundshëm të bankave të tjera në mbarë botën nuk janë zhdukur plotësisht nga përpjekja e Biden për të rivendosur besimin në institucionet financiare. "Amerikanët mund të kenë besim se sistemi bankar është i sigurt," tha Biden të hënën në komentet televizive nga Shtëpia e Bardhë në një përpjekje për të minimizuar dështimin e sistemit bankar amerikan.