Kremlini: Putin i hapur për çdo kontakt për "problemin ukrainas"

Kremlini deklaroi se presidenti rus Vladimir Putin mbetet i hapur për çdo bisedë për zgjidhjen e konfliktit në Ukrainë.

Njoftimi erdhi të premten në prag të takimit të liderëve afrikanë për t'i paraqitur Putinit një nismë të re paqeje, pothuajse 16 muaj pas nisjes së konfliktit ushtarak në Ukrainë. “Presidenti Putin ishte dhe është i hapur për çdo kontakt për të diskutuar skenarë të mundshëm për zgjidhjen e problemit ukrainas”, citoi Interfax të ketë thënë zëdhënësi i Kremlinit, Dmitry Peskov. Rusia ka thënë prej kohësh se është e hapur për bisedime, por thotë se Ukraina duhet të njohë "realitetet e reja" në terren, ku forcat e saj kontrollojnë rreth 18 për qind të territorit të Ukrainës. Vjeshtën e kaluar, Moska aneksoi katër rajone në Ukrainën lindore dhe jugore, si dhe gadishullin e Krimesë, të cilin e aneksoi në vitin 2014. Ukraina thotë se plani i saj i paqes, i cili kërkon tërheqjen e forcave ruse nga i gjithë territori ukrainas, duhet të jetë baza për çdo zgjidhje të konfliktit. Delegacioni afrikan është planifikuar të zhvillojë bisedime me presidentin ukrainas Volodymyr Zelensky të premten përpara se të takohet me Putin në Shën Petersburg të shtunën.