Papa Françesku dënon djegiet e Kuranit si 'barbare'
Papa Françesku i ka denoncuar si “barbare” djegiet e fundit të Kuranit në Suedi dhe Danimarkë, duke thënë se lëvizje të tilla blasfemike pengojnë dialogun mes kombeve.
Papa Françesku i bëri komentet në një letër të martën, në përgjigje të klerikut shi'it argjentinas Abdul Karim Paz, përfaqësues i fondacionit islamik të Argjentinës. Javën e kaluar, Abdul Karim Paz i dërgoi një letër kreut të Kishës Katolike, në të cilën ai dënoi aktet e përsëritura të djegies së librit të shenjtë mysliman dhe tha se ato ishin kundër unitetit të feve abrahamike. “Historia e djegies së Kuranit të Shenjtë është me të vërtetë një akt barbar. Këto raste dëmtojnë dhe parandalojnë dialogun e pjekur mes njerëzve”, shkroi në përgjigje Papa Françesku. Papa Françesku tashmë ka dënuar aktet fyese ndaj Kuranit, duke shprehur "zemërim dhe neveri" për këto lëvizje. Në një intervistë me gazetën e Emirateve të Bashkuara Arabe al-Ittihad në fillim të korrikut, Papa kritikoi lejimin e përdhosjes së Kuranit nën pretekstin e "lirisë së fjalës". Aktet fyese kanë ndezur zemërimin e të gjithë komunitetit mysliman anembanë globit. Disa vende kanë thirrur ose dëbuar ambasadorët suedezë dhe danezë. Vendet nordike kanë shprehur keqardhje për përdhosjen e Kuranit, por pretendojnë se nuk mund ta parandalojnë atë sipas ligjeve kushtetuese që mbrojnë lirinë e fjalës.
