Rusia ndalon hyrjen e 54 gazetarëve dhe ministrave britanikë
Rusia ka ndaluar 54 shtetas të tjerë britanikë të hyjnë në vend, në përgjigje të sanksioneve të Mbretërisë së Bashkuar kundër qytetarëve dhe ndërmarrjeve të saj, sipas Ministrisë së Punëve të Jashtme ruse.
Rusia i akuzoi individët dhe entitetet për përfshirje në “mbështetje propagandistike të aktiviteteve të regjimit të Zelenskyt” dhe për “rusofobi”, në përditësimin e fundit të politikës së saj të sanksioneve. Lista e sanksioneve përfshin disa ministra të qeverisë, si dhe gazetarë nga transmetuesi publik BBC, gazeta Guardian dhe gazeta Daily Telegraph. “Ne dëshirojmë të theksojmë sërish se çdo përpjekje e Londrës për të shtyrë më tej valën e sanksioneve anti-ruse do të marrë në mënyrë të pashmangshme një përgjigje vendimtare nga ana jonë”, tha ministria e Jashtme ruse në një deklaratë. Ajo shtoi se puna për zgjerimin e ‘listës së ndalimit’ në përgjigje të veprimeve të autoriteteve britanike do të vazhdojë. Ndalimi i hyrjes përfshin prokurorin britanik Karim Khan, i cili është një zyrtar i zgjedhur në Gjykatën Penale Ndërkombëtare, për shkak të përfshirjes së tij “në lëshimin e një urdhër arresti për udhëheqjen ruse”, sipas deklaratës së Ministrisë së Jashtme ruse. Ministrja e kabinetit britanik, Lucy Frazer, Sekretarja e Shtetit për Kulturën, Median dhe Sportin u përfshi gjithashtu në listën e përditësuar, me autoritetet ruse që pretendojnë se ajo “po lobon në mënyrë aktive për izolimin sportiv ndërkombëtar të Rusisë”. Sanksionet e reja përfshijnë gjithashtu një Ministre të Shtetit në Ministrinë Britanike të Mbrojtjes, baroneshën Goldie DL, të cilën Rusia e ka akuzuar se është “përgjegjëse për furnizimin me armë në Ukrainë, duke përfshirë predha me uranium të varfëruar”.
