Putin: Rusia mbështet plotësisht krijimin e shtetit palestinez
Presidenti rus Vladimir Putin deklaroi se Moska ka mbështetur gjithmonë plotësisht krijimin e një shteti palestinez.
Duke folur në seancën plenare të Javës Ruse të Energjisë të mërkurën, Putin theksoi se vendi i tij gjithmonë ka mbështetur zbatimin e vendimit të Këshillit të Sigurimit të Kombeve të Bashkuara për krijimin e një shteti të pavarur palestinez.
“Ne gjithmonë kemi mbështetur zbatimin e vendimeve të Këshillit të Sigurimit të OKB-së, para së gjithash, krijimin e një shteti të pavarur palestinez”, theksoi lideri rus.
Më tej në fjalën e tij, Putin e quajti shpërthimin e dhunës midis Izraelit dhe palestinezëve një shembull të gjallë të dështimit të politikës amerikane në Lindjen e Mesme. Ai theksoi se politika e Uashingtonit në rajon nuk ka marrë parasysh nevojat e palestinezëve pasi Shtëpia e Bardhë u përpoq të fokusohej në ndihmën financiare, në vend që të gjente zgjidhje për sfidat ekzistuese themelore politike.
“Është e paqartë nëse do të jetë e mundur të qetësohet disi situata në të ardhmen e afërt, por ne duhet të përpiqemi për këtë, sepse zgjerimi i zonës së konfliktit mund të çojë në pasoja të tmerrshme”, tha Putin.
Presidenti rus denoncoi gjithashtu si një gabim lëvizjen e Uashingtonit për dërgimin e një grupi sulmues luftanijesh, i cili përfshin aeroplanmbajtësen USS Gerald R. Ford, afër Izraelit.
“Unë nuk e kuptoj pse SHBA po dërgon grupet e aeroplanmbajtëseve në Detin Mesdhe. Nuk e kuptoj thelbin. A do të bombardojnë Libanin apo çfarë? Apo kanë vendosur të përpiqen të trembin dikë? Aty ka njerëz që nuk kanë më frikë nga asgjë. Kjo nuk është mënyra për të zgjidhur problemin. Duhet të kërkohen zgjidhje kompromisi. Natyrisht, veprime të tilla po e ndezin situatën”, tha Putin.
