Kina kërkon armëpushim të shpejtë në Gaza

Kina kërkoi një armëpushim të menjëhershëm në Gaza në mes të vazhdimit të sulmeve brutale të Izraelit në rajonin e rrethuar, duke shprehur gatishmërinë e saj për të punuar me palët përkatëse për të ndihmuar në de-përshkallëzimin e situatës "jashtëzakonisht të tmerrshme" në Gaza.

"Kina bën thirrje për një armëpushim të menjëhershëm midis palëve në konflikt, dhe të bëhen të gjitha përpjekjet e mundshme për të mbrojtur civilët dhe përpjekje të zgjeruara të ndihmës humanitare për të lehtësuar krizën humanitare," tha të hënën zëdhënësja e Ministrisë së Jashtme kineze Mao Ning në një konferencë të rregullt për shtyp.

Ajo shtoi se në më shumë se një muaj që nga fillimi i gjenocidit të Izraelit kundër palestinezëve në Gaza, situata humanitare është bërë "jashtëzakonisht e rëndë".

Ajo e përshkroi Spitalin Al-Shifa, kompleksin më të madh mjekësor në territorin e rrethuar, si një "mishërim" të krizës humanitare në Gaza.

Zëdhënësja kineze u bëri thirrje anëtarëve të komunitetit ndërkombëtar që të marrin "masa thelbësore dhe të bëjnë një përpjekje të madhe" për t'i dhënë fund sulmit të Izraelit ndaj këtij spitali.

Spitali Al-Shifa, i vendosur në veri të Gazës, aktualisht është i rrethuar nga tanket izraelite dhe përballet me ndërprerje të energjisë pasi gjeneratorit të fundit të këtij spitali i mbaroi karburanti.