Paralajmërim i Organizatës së Inteligjencës Turke për regjimin sionist
Pasi autoritetet e regjimit sionist njoftuan se do të vrasin liderët e Hamasit kudo në botë, përfshirë Turqinë dhe Katarin, një zyrtar i Organizatës së Inteligjencës Turke paralajmëroi për pasojat e këtij veprimi të regjimit sionist.
Inteligjenca izraelite është e gatshme të eliminojë liderët e grupit palestinez Hamas në mbarë botën, duke përfshirë Katarin dhe Turqinë, ku ndodhen disa prej tyre, sipas një regjistrimi audio të transmetuar nga “Radio Kan” të deklaratave të bëra nga drejtori i Agjencisë së Sigurisë të Izraelit, Ronen Bar.
“Kabineti vendosi një synim për ne, të zhdukim Hamasin. Dhe ne jemi të vendosur ta bëjmë këtë, ky është Mynihu ynë”, tha ai, duke iu referuar operacionit 20-vjeçar izraelit për të gjurmuar autorët përgjegjës për sulmin e vitit 1972, që njihet si Sulmet e Olimpiadës së Mynihut.
Në një fragment tjetër, të transmetuar nga Radio Kan, zyrtari i sigurisë vuri në dukje: “Në çdo vendndodhje, në Gaza, në Bregun Perëndimor, në Liban, në Turqi, në Katar, kudo. Do të duhen disa vite, por ne do të jemi atje për ta bërë atë”, shtoi ai.
Pas publikimit të këtij lajmi, agjencia e lajmeve Reuters citoi një zyrtar të Organizatës së Inteligjencës Turke të ketë thënë se Ankaraja paralajmëroi për pasojat e tmerrshme të përpjekjes së Izraelit për të vrarë zyrtarët e Hamasit në Turqi.
Nga ana tjetër, ndaj këtij kërcënimi reagoi edhe Taher al-Nunu, këshilltari për informim i kreut të Byrosë Politike të Hamasit, i cili tha se këto janë kërcënime për të dëmtuar sigurinë e këtyre vendeve dhe armiku duhet të ndiqet penalisht për këtë."
