NATO po përgatitet seriozisht për një konflikt me Rusinë
Rusia tha se manovrat ushtarake të NATO-s që po zhvillohen aktualisht me përdorimin e armëve hibride dhe konvencionale pranë kufijve të Rusisë tregojnë se aleanca perëndimore po përgatitet seriozisht për një konflikt me Moskën.
Zëdhënësja e Ministrisë së Jashtme ruse Maria Zakharova tha të shtunën se "stërvitja më e madhe e NATO-s që nga Lufta e Ftohtë, e koduar 'Mbrojtësi i Patundur', po zhvillohet pranë kufijve të Rusisë".
Ajo tha se “veprimet e aleancës kundër Rusisë po praktikohen duke përdorur të gjitha instrumentet, përfshirë armët hibride dhe ato konvencionale”.
“Duhet të pranojmë se NATO po përgatitet seriozisht për një konflikt të mundshëm me ne”, shtoi ajo.
Sipas aleancës perëndimore, NATO nisi manovrat ushtarake me pjesëmarrjen e rreth 90,000 trupave në janar për të treguar "se NATO mund të kryejë operacione komplekse me shumë fusha për disa muaj, në mijëra kilometra".
NATO i ka përshkruar më parë stërvitjet ushtarake si "një skenar të simuluar konflikti me një kundërshtar të afërt". Manovrat e NATO-s do të vazhdojnë deri në fund të majit.
