Zelensky do t’i prezantojë SHBA-së planin e fitores

Presidenti ukrainas Volodymyr Zelensky ka thënë se inkursioni i trupave të tij në rajonin e Kurskut të Rusisë është pjesë e një “plani të fitores” që ai do t’ia paraqesë presidentit amerikan Joe Biden muajin e ardhshëm.

Duke folur në një forum të martën, Presidenti Zelensky tha se suksesi i planit do të varet nga Presidenti Biden dhe nëse SHBA do t’i jepte Ukrainës “atë që është në këtë plan apo jo, dhe nëse do të jemi të lirë ta përdorim këtë plan apo jo”.

“Mund të tingëllojë shumë ambicioze për disa, por është një plan i rëndësishëm për ne”, shtoi Zelensky, duke thënë se planin do t’ua tregonte edhe kandidatëve për president të SHBA-së Kamala Harris dhe Donald Trump.

Presidenti Zelensky zbuloi gjithashtu se Ukraina kishte kryer së fundmi testin e parë të suksesshëm të një rakete balistike të prodhimit vendas. Ai përgëzoi industrinë e mbrojtjes së vendit të tij, por nuk pranoi të ndajë më shumë detaje rreth raketës.

Duke folur në të njëjtin forum, komandanti i lartë ushtarak i Kievit, gjenerali Oleksandr Syrskyi, tha se Ukraina tani kontrollon 1294 km katrorë të territorit rus dhe 100 vendbanime.

Gjenerali Syrskyi tha se Ukraina nuk kishte ndërmend të mbante territorin dhe se një motiv për inkursionin ishte të largonte forcat ruse nga ofensiva e tyre në Ukrainën lindore.

Sidoqoftë, në dy netët e fundit, Rusia ka goditur Ukrainën me një breshëri sulmesh me dronë dhe raketa, të cilat kanë lënë të vdekur disa njerëz dhe kanë shkaktuar ndërprerje të energjisë elektrike në zona të ndryshme të vendit.

Që nga inkursioni i Kurskut, Rusia ka sinjalizuar se nuk do të angazhohet në asnjë negociatë për paqe me Ukrainën.