Dëbimet diplomatike Rusi-MB gjatë dekadave të fundit, janë të shumta

Njoftimi i Rusisë për dëbimin e gjashtë diplomatëve britanikë për spiunazh të dyshuar është denoncuar nga Mbretëria e Bashkuar.

Njoftimi i Moskës të premten për dëbimin e gjashtë diplomatëve britanikë të dyshuar për spiunazh ka ngjallur qortimin e fortë nga Mbretëria e Bashkuar, ndërsa ka intensifikuar gjithashtu armiqësinë midis Rusisë dhe Perëndimit për luftën në Ukrainë.   Megjithatë, të gjashtë personat janë vetëm një numër i vogël në historinë e akteve të dëbimit të diplomatëve nga Moska dhe Londra, të cilat gjatë dekadave të fundit kanë një rekord të gjatë zemërimi. Të dyja palët kanë dëbuar më shumë se 20 diplomatë në të njëjtën kohë - dhe në një rast, më shumë se 100.  Dëbimet janë shpesh lëvizje kokë më kokë, ku njëra palë hakmerret për aktin e tjetrës, diçka që gjuha diplomatike ruse e quan "përgjigje pasqyrë". Këtu është një historik mbi disa akte kryesore të dëbimit të diplomatëve midis Londrës dhe Moskës: Sergei Skripal, një oficer rus i inteligjencës, i cili ishte një agjent i dyfishtë për Britaninë, u helmua rëndë së bashku me vajzën e tij në Salisbury, ku ishte vendosur pasi u lirua nga Rusia në një shkëmbim të burgosurish në vitin 2010. Helmi u identifikua si Novichok, një agjent nervor i zhvilluar nga sovjetikët. Një javë e gjysmë pasi Skripalët u zbuluan në gjendje të rëndë, kryeministrja britanike Teresa May deklaroi se Rusia ishte përgjegjëse për sulmin dhe urdhëroi dëbimin e 23 diplomatëve. Rusia më pas dëboi një numër të barabartë britanikësh. Oleg Gordievsky ishte shefi i stacionit të KGB-së në Londër, kishte vite që i transmetonte informacione inteligjencës britanike. Ai u thirr përsëri në Moskë për konsultime në vitin 1985 dhe vendosi të largohej pavarësisht frikës se roli i tij si agjent i dyfishtë mund të ishte ekspozuar. Ai u mor në pyetje, por nuk u akuzua dhe Britania organizoi një operacion të fshehtë për ta nxjerrë atë nga Bashkimi Sovjetik. Pas operacionit, Britania përdori informacionin nga Gordievsky për të dëbuar 25 diplomatë sovjetikë. Moska u hakmor dy ditë më vonë me të njëjtin numër. Në një përpjekje për të frenuar spiunazhin e dyshuar nga diplomatët sovjetikë dhe madje edhe gratë e tyre, agjentët britanikë arritën të rekrutojnë një anëtar të delegacionit tregtar sovjetik, i cili ishte gjithashtu një operativ i KGB-së. Agjenti, Oleg Lyalin, dha informacione të gjera duke identifikuar të tjerët që punonin për KGB-në. Britania hezitoi të vepronte sipas informacionit, e shqetësuar se mund të rrezikonte bisedimet ndërkombëtare që po zhvilloheshin për statusin e qytetit të ndarë të Berlinit. Pas përfundimit të bisedimeve, Britania e Madhe njoftoi se 90 zyrtarë sovjetikë do të dëboheshin dhe 15 të tjerë që ishin jashtë vendit në atë kohë nuk do të lejoheshin të ktheheshin - gjithsej 105.