Macron kërkon ndalimin e furnizimit me armë drejt Izraelit
Presidenti francez Emmanuel Macron kërkoi ndalimin e dërgesave të armëve për Izraelin, duke bërë thirrje për një zgjidhje politike në luftën gati njëvjeçare në Gaza.
“Unë mendoj se sot, prioriteti është që ne të kthehemi te një zgjidhje politike, që të ndalojmë dorëzimin e armëve për të luftuar në Gaza”, i tha Macron transmetuesit France Inter, duke shtuar se Franca nuk po dërgon asnjë armë në Izrael.
Macron përsëriti shqetësimin e tij për konfliktin në Gaza që po vazhdon pavarësisht thirrjeve të përsëritura për një armëpushim. “Unë mendoj se ne nuk po dëgjohemi. Mendoj se është një gabim, duke përfshirë sigurinë e Izraelit”, tha ai duke shtuar se konflikti po shkakton urrejtje.
Shtetet e Bashkuara i japin Izraelit rreth 3 miliardë dollarë armë çdo vit dhe që prej fillimit të luftës në Gaza i ka dhuruar Izraelit më shumë se 14 miliardë dollarë.
Në maj, Departamenti i Shtetit tha se nuk kishte prova të mjaftueshme për të bllokuar dërgesat e armëve, por se ishte e arsyeshme të vlerësohej se Izraeli ka përdorur armë në mënyra që nuk janë në përputhje me standardet e ligjit humanitar.
Në shtator, Britania tha se po pezullonte disa eksporte të armëve në Izrael, duke përmendur një rrezik të qartë se ato mund të përdoren në një shkelje serioze të ligjit ndërkombëtar humanitar.