Rikthehet përmbytja në Spanjë/Mijëra njerëz evakuohen nga brigjet e lumenjve

Mijëra njerëz nga rajonet jugore të Spanjës evakuuan shtëpitë e tyre me kthimin e shirave të rrëmbyeshëm.

Sipas gazetës "The Guardian", dy javë pas përmbytjeve katastrofike në Spanjë, që lanë të paktën 215 të vdekur, shirat e rrëmbyeshëm u kthyen në vend dhe autoritetet në lindje dhe në jug të Spanjës mbyllën shkollat.

Ndërkohë që ka nisur procesi i evakuimit të disa banorëve, agjencia shtetërore meteorologjike e vendit ka dhënë nivelin më të lartë të paralajmërimit për dy provincat, Tarragona në verilindje dhe Malaga në jug të Spanjës.

Rajoni autonom i Andaluzisë mbylli gjithashtu shkollat ​​në dy provinca dhe evakuoi 3000 njerëz që jetonin pranë lumenjve.

Gjithashtu, thuhet se janë anuluar lëvizjet e trenave të shpejtësisë së lartë nga Malaga në Madrid dhe anasjelltas.

Reshjet nuk priten të jenë aq të dendura sa shirat e dy javëve të fundit, por njerëzit ende kanë frikë se shkatërrimi do të jetë më i keq, pasi gjendja e kanalizimeve është e rrezikuar dhe sasi të mëdha balte kanë mbetur mbi tokë.

Thuhet se 23 persona janë ende të zhdukur që dy javë më parë dhe kërkimet për trupat e tyre vazhdojnë ende.

Kjo përmbytje, e cila është fatkeqësia më e keqe natyrore në historinë moderne të Spanjës, ka çuar në një konflikt midis autoriteteve dhe në protesta të përhapura mes njerëzve.

Mbrëmjen e së shtunës, më shumë se 130 mijë protestues dolën në rrugë në qytetin e Valencias dhe kërkuan dorëheqjen e Carlos Mazon, kreut të qeverisë rajonale të Valencias, në shenjë proteste për keqmenaxhimin e situatës.