SHBA paralajmëron Turqinë për liderët e Hamasit

Administrata e presidentit amerikan Joe Biden ka paralajmëruar Turqinë kundër pritjes së anëtarëve të udhëheqjes së Hamasit, pasi dolën raporte se disa anëtarë të lartë të Hamasit u larguan nga Katari për në Ankara javën e kaluar.

I pyetur në lidhje me raportet se qeveria turke po priste udhëheqjen e krahut politik të Hamasit, zëdhënësi i Departamentit të Shtetit të SHBA, Matthew Miller u tha gazetarëve se nuk ishte në gjendje të mohonte këtë pretendim.

“Ne nuk besojmë se udhëheqësit e një organizate të egër terroriste duhet të jetojnë të qetë kudo”, ka thënë Miller, duke shtuar se kjo vlen veçanërisht për kryeqytetin turk – një “qytet i madh i një prej aleatëve dhe partnerëve tanë kryesorë”.

Transmetuesi publik izraelit Kan tha se anëtarët e Hamasit u nisën nga Doha në Ankara pasi qeveria e Katarit njoftoi se po largohej nga përpjekjet e saj të mëparshme për të negociuar një armëpushim midis Izraelit dhe Hamasit.

Burimet diplomatike turke kanë hedhur poshtë më parë raportet se Hamasi po zhvendos zyrën e tij politike në Turqi, duke thënë se anëtarët e grupit militant palestinez e vizitojnë rrallë këtë vend.

Dy javë më parë, një zyrtar amerikan tha se administrata Biden i tha Katarit se zyra e grupit militant në Doha nuk ishte më e dobishme dhe delegacioni i Hamasit duhet të dëbohej.