Republikanët amerikanë përgatisin projektligjin për të blerë Grenlandën
Anëtarët republikanë të Dhomës së Përfaqësuesve të SHBA-së kanë paraqitur një projekt-ligj për të autorizuar negociatat për blerjen e Grenlandës dhe po kërkojnë mbështetje nga ligjvënësit amerikanë.
Sipas agjencisë iraniane të lajmeve IRNA, duke cituar agjencinë e lajmeve Reuters, Andy Ogles dhe Diana Harsh Barger, anëtarë republikanë të Dhomës së Përfaqësuesve, janë ndër arkitektët kryesorë të këtij plani.
Projektligji propozon që presidenti i sapozgjedhur i SHBA-së, Donald Trump, të hyjë në negociata me Danimarkën për blerjen e ishullit të Grenlandës duke filluar nga 20 janari, ditën kur ai do të betohet si president.
Trump ka njoftuar se dëshiron që Grenlanda të bëhet pjesë e Shteteve të Bashkuara të Amerikës. Ai nuk e ka përjashtuar mundësinë e përdorimit të forcës ushtarake dhe ekonomike për të detyruar Danimarkën të lëshojë ishullin.
Grenlanda ka qenë nën kontrollin e Danimarkës për shekuj me radhë. Ishulli ishte më parë një koloni daneze dhe tani është një rajon gjysmë autonom nën kontrollin e Danimarkës.
Grenlanda, veçanërisht baza e saj ajrore e quajtur Pitofik, është e një rëndësie strategjike për ushtrinë amerikane dhe sistemin e paralajmërimit të hershëm në sistemin e raketave balistike të këtij vendi dhe konsiderohet si rruga më e afërt midis Evropës dhe Amerikës së Veriut.
Kryeministri i Grenlandës, Mute Egede, ka shtuar përpjekjet për të fituar pavarësinë nga Danimarka. Ai ka theksuar vazhdimisht se ishulli nuk është në shitje dhe se u takon banorëve të Grenlandës të vendosin për të ardhmen e tij.
Megjithatë, dje Mute Egede tha: "Grenlanda nuk është e interesuar të bashkohet me Shtetet e Bashkuara të Amerikës, por mirëpret vendosjen e lidhjeve të ngushta me Uashingtonin në fushat e sigurisë, mbrojtjes dhe tregtisë."
