Bota e konsideron të papranueshëm planin e Trump për Gazën

Kryediplomati turk kritikoi të mërkurën propozimin e presidentit amerikan, Donald Trump që Shtetet e Bashkuara të marrin Rripin e Gazës dhe të zhvendosin palestinezët në vende të tjera.

“Kjo është një çështje e papranueshme”, tha ministri i Jashtëm turk, Hakan Fidan, për agjencinë zyrtare të lajmeve Anadolu.

Ai tha se zhvendosja e palestinezëve nga Gaza ishte diçka që “as ne dhe as rajoni nuk mund ta pranojmë”. “Është e gabuar edhe ta sjellësh atë për diskutim”, shtoi ai.

Ministria e Jashtme e Arabisë Saudite tha në një deklaratë se "Princi i kurorës Mohammed bin Salman ka pohuar qëndrimin e mbretërisë në një 'mënyrë të qartë dhe eksplicite' që nuk lejon asnjë interpretim në asnjë rrethanë".

Ministri i Jashtëm egjiptian Badr Abdelatty bëri thirrje për një rindërtim të shpejtë të territorit palestinez "pa largimin e palestinezëve".

Ministrat e Jashtëm nga disa vende evropiane kanë dalë gjithashtu kundër Trump, duke thënë se zhvendosja e palestinezëve është kundër ligjit ndërkombëtar.

Ministri i Jashtëm spanjoll Jose Manuel Albares tha: "Dua të jem shumë i qartë për këtë: Gaza është toka e palestinezëve të Gazës dhe ata duhet të qëndrojnë në Gaza".

Ministrja e Jashtme gjermane, Annalena Baerbock, tha: “Zhvendosja e popullatës civile palestineze nga Gaza do të ishte thjesht e papranueshme dhe kundër ligjit ndërkombëtar. Kjo do të çonte gjithashtu në vuajtje të reja dhe urrejtje të re.”

Zëdhënësi i Ministrisë së Jashtme të Francës, Christophe Lemoine përsëriti "kundërshtimin e Parisit ndaj çdo zhvendosjeje të detyruar të popullsisë palestineze të Gazës, e cila do të përbënte një shkelje serioze të ligjit ndërkombëtar" dhe "pengesë të madhe për zgjidhjen me dy shtete".

Kryeministri i Britanisë Keir Starmer tha se populli i Gazës “duhet të lejohet të kthehet në shtëpi, duhet të lejohet të rindërtohet dhe ne duhet të jemi me ta në atë rindërtim në rrugën drejt një zgjidhjeje me dy shtete”.

Rusia dhe Kina kundërshtuan gjithashtu zhvendosjen e popullit të Gazës pasi Moska dhe Pekini besojnë se një paqe në Azinë Perëndimore është e mundur vetëm në bazë të një zgjidhjeje me dy shtete.