Trump: Jam i përkushtuar të blej Gazën

Presidenti amerikan Donald Trump tha se ai është i përkushtuar për të blerë dhe zotëruar Rripin e Gazës dhe ndoshta për t'i dhënë pjesë të tij për rindërtim vendeve të tjera të Lindjes së Mesme.

Sipas agjencisë iraniane të lajmeve IRNA, duke cituar agjencinë e lajmeve Reuters, në një bisedë me gazetarët në orët e para të mëngjesit të së hënës Trump pretendoi se ai “do ta shndërronte Gazën në një vend të shkëlqyeshëm për zhvillim në të ardhmen”.

Ai shtoi se do të zhvillojë bisedime me Princin e Kurorës Saudite, Mohammed bin Salman dhe presidentin egjiptian Abdel Fattah al-Sisi dhe pret që pas bisedave të tij ata të bien dakord të pranojnë të shpërngulurit palestinezë.

Trump, në një pjesë tjetër të pretendimeve të tij, tha: “Unë do të kujdesem për palestinezët dhe do të sigurohem që ata të mos vriten”.

Kohët e fundit, Trump bëri thirrje për evakuimin e plotë të Rripit të Gazës, zhvendosjen e banorëve të saj në vendet fqinje arabe dhe në rajone të tjera, si dhe kontrollin e SHBA-së mbi Rripin e Gazës.

Ai përmendi si pretekst mungesën e kushteve të jetesës në Rripin e Gazës për shkak të shkatërrimeve të gjera të shkaktuara nga sulmet e ushtrisë së regjimit sionist dhe urdhëroi vendet arabe fqinje me Territoret e Pushtuara, përfshirë Egjiptin dhe Jordaninë, të mirëpresin dhe të ofrojnë banim për popullin e Gazës.

Pas këtyre deklaratave të presidentit Trump, shumë vende anembanë botës shpallën kundërshtimin e tyre ndaj këtij plani.

Navi Pillay, kryetarja e Komisionit Hetimor të OKB-së për Territoret e Pushtuara Palestineze, tha gjithashtu se plani i presidentit amerikan Donald Trump për të zhvendosur njerëzit nga Rripi i Gazës është “dëshmi e spastrimit etnik” dhe “i paligjshëm”.

Në një intervistë me gazetën "Politico" të publikuar të dielën, Pillay tha: “Për fat të keq, Trump po injoron ligjin ndërkombëtar. Shpërngulja e detyruar e një grupi njerëzish, toka e të cilëve është pushtuar, është një shembull i spastrimit etnik”.