Rusia kritikon SHBA për sanksionet e reja ndaj Rusisë dhe Sirisë

Ministria ruse e Punëve të Jashtme kritikoi sot sanksionet e reja të SHBA-së kundër Rusisë dhe Sirisë.

“Ky zgjerim i sanksioneve amerikane kundër Rusisë (…), në një moment që sulmet e përgjakshme në Ankara dhe Berlin duhet të bashkojnë njerëzit e arsyeshëm në rezistencën e tyre ndaj kërcënimit terrorist, dëshmon për një humbje të plotë nga Uashingtoni të sensit të realitetit”, thuhet në një komunikatë të Ministrisë. “SHBA përpiqet kështu të na ndëshkojë për mbështetjen e qeverisë siriane në luftën kundër terrorizmit që kërcënon jo vetëm këtë vend, por të gjithë botën”, shton kjo ministri. SHBA njoftoi dje se ka vendosur në listën e saj të zezë ekonomike gjashtë ministra siriane dhe përgjegjës të bankës ruse “Tempbank” për rolin e tyre të dyshuar për dhunën e kryer nga regjimi i presidentit Bashar Asad.