Parlamenti i Katalonjës miraton referendumin e pavarësisë

Parlamenti në rajonin e Katalonjës, në Spanjë, ka miratuar mbajtjen e një referendumi për pavarësinë e këtij rajoni më 1 tetor, të cilin Madridi ka premtuar ta nxjerrë jashtë ligjit.

Partitë separatiste që mbajnë një shumicë të vogël, mbështetën ligjin e referendumit dhe kuadrin ligjor të nevojshëm për të krijuar një shtet të pavarur. Nga ana tjetër, kryeministri spanjoll Mariano Rajoy i ka kërkuar gjykatës kushtetuese të anulojë atë. Ai do të zhvillojë një mbledhje urgjente të kabinetit të enjten dhe do të takohet me krerët e tjerë të partisë, ndërsa zëvendësi i tij, më herët akuzoi separatistët katalonasë për shkeljen e demokracisë. Rajoni i pasur verilindor i Spanjës tashmë ka kompetenca autonome, por qeveria rajonale thotë se ka mbështetje popullore për ndarjen e plotë. Qeveria katalonase ka shumicën në parlamentin rajonal, të përbërë nga koalicioni separatist Junts pel Si (Së bashku për Po) dhe partia e krahut të majtë CUP.