Turqia të tregojë vetëpërmbajtje në Siri

Sekretari i Mbrojtjes i SHBA-së James Mattis i ka bërë thirrje Turqisë të ushtrojë vetëpërmbajtje në fushatën e saj ushtarake kundër forcave kurde në Sirinë veriperëndimore.

"Ne i marrim seriozisht shqetësimet legjitime të sigurisë së Turqisë dhe jemi të vendosur të punojmë me aleatët tanë të NATO-s mbi ato," tha Mattis në Xhakarta të martën në fillim të një turneu aziatik. "Ne i bëjmë thirrje Turqisë të ushtrojë vetëpërmbajtje në veprimin ushtarak në Siri". "Dhuna në Afrin shkatërron atë që ishte një zonë relativisht e qëndrueshme në Siri dhe çrregullon përpjekjet ndërkombëtare për të mposhtur ISIS-in", shtoi Mattis. Turqia nisi të shtunën operacionin e ashtuquajtur Dega e Ullirit në një përpjekje për të eliminuar militantët e YPG të mbështetur nga SHBA, të cilën Ankaraja e sheh si një organizatë terroriste dhe degën siriane të Partisë së Punëtorëve të Kurdistanit (PKK). Sipas Observatorit Sirian për të Drejtat e Njeriut, 22 civilë sirianë janë vrarë në sulmet artilerike dhe sulmet ajrore turke, dhe mijëra kanë ikur nga shtëpitë e tyre. Të martën, Ministri i Jashtëm turk Mevlut Çavusoglu tha se Turqia kërkon të shmangë çdo konfrontim me forcat amerikane, ruse apo siriane, por theksoi se do të miratojë çdo masë që kërkohet për sigurinë e saj. "Terroristët në Manbixh janë duke qëlluar vazhdimisht me të shtëna provokuese. Nëse Shtetet e Bashkuara nuk e ndalojnë këtë, ne do ta ndalojmë atë," deklaroi ai për kanalin informativ turk Haberturk.