SHBA miraton shitjen e fshehtë të teknologjisë bërthamore Arabisë Saudite

Administrata e Presidentit të SHBA Donald Trump ka miratuar gjashtë autorizime që lejojnë kompanitë amerikane që të furnizojnë në mënyrë sekrete Arabinë Saudite me teknologji bërthamore ose asistencë teknike, tregon një dokument zyrtar.

Sipas dokumentit, të publikuar të mërkurën nga Departamenti i Energjisë dhe i parë nga agjencia Reuters, firmat kishin kërkuar nga qeveria e SHBA-së t'i mbante sekret autorizimet e tyre. "Në këtë rast, secila nga kompanitë që kanë marrë një autorizim të posaçëm për Arabinë Saudite na kanë ofruar kërkesë me shkrim që autorizimi i tyre të mos bëhet publik", shkroi në dokumentin e saj administrata Kombëtare e Sigurisë Bërthamore të SHBA. Sipas Reuters, një burim i informuar, i cili foli në kushte anonimiteti, tha gjithashtu se autorizimet i lejonin kompanitë amerikane të bëjnë punë paraprake mbi energjinë bërthamore përpara çdo marrëveshjeje, por nuk duhet të dërgojnë pajisje që mund të futen në një objekt bërthamor. Në një seancë dëgjimore të Kongresit të mërkurën, përfaqësuesi Brad Sherman i kërkoi Sekretarit të Shtetit Mike Pompeo të publikojë emrat e kompanive që morën autorizimet, duke akuzuar administratën Trump për përpjekje për t'iu shmangur Kongresit për çështjen e dhënies së teknologjisë bërthamore Riadit. Shumë anëtarë të Kongresit amerikan janë të shqetësuar për ofrimin e teknologjisë bërthamore Arabisë Saudite, një forcë destabilizuese nën klanin Salman. Muajin e kaluar, një raport i një komiteti të Kongresit zbuloi se administrata Trump po përpiqej të anashkalonte Kongresin për të transferuar teknologji të ndjeshme të energjisë bërthamore në Arabinë Saudite. Ministri i Jashtëm i Iranit, Muhamed Xhavad Zarif në atë kohë e kritikoi "hipokrizinë" amerikane në shitjen e planifikuar të teknologjisë bërthamore regjimit saudit. Me mbështetjen sekrete të administratës Trump - e cila është fuqimisht e kundërshtare e Iranit - raporton Reuters, nuk ka gjasa që Arabia Saudite do të lejojë çdo monitorim kuptimplotë ndërkombëtar të punës së saj bërthamore sapo të jetë në zotërim të teknologjisë, duke shtuar shqetësimet rreth përhapjen së armëve bërthamore. Regjimi izraelit, një kundërshtar tjetër i Iranit, gjithashtu ka një program të armëve bërthamore që nuk i nënshtrohet fare ndonjë monitorimi ndërkombëtar, kryesisht për shkak të mbështetjes nga Uashingtoni. Nën Mbretin Salman dhe djalin e tij, Muhamed, Arabia Saudite kohët e fundit i ka forcuar marrëdhëniet me regjimin e Tel Avivit.