Vëzhguesit shprehen pozitivisht për zgjedhjet presidenciale në Ukrainë

Vëzhguesit ndërkombëtarë thanë të hënën se zgjedhjet presidenciale që u mbajtën të dielën në Ukrainë ishin "të administruara mirë" dhe "konkurruese".

Organizata për Siguri dhe Bashkëpunim në Evropë tha se rrethi i parë i votimeve ka ofruar zgjedhje të gjerë kandidatësh dhe se pjesëmarrja ka qenë e lartë. Komediani pa përvojë politike, Volodymyr Zelenskiy, fitoi më së shumti vota në zgjedhjet e 31 marsit. Me 84% të votave të numëruara, Zelenskiy fitoi 30.4% të tyre, bëri të ditur Komisioni Qendror i Zgjedhjeve. Sipas rezultateve të tij, i dyti doli presidenti aktual i Ukrainës, Petro Poroshenko, me 16%, ndërsa e treta ish-kryeministrja e këtij vendi, Yulia Tymoshenko, me 13.3%. Dy të parët pritet të shkojnë në balotazh, muajin e ardhshëm. Kryetarja e Komisionit Qendror të Zgjedhjeve, Tetyana Slipachuk, tha se votimi dhe numërimi i votave u zhvilluan "pa shkelje sistematike". Sipas saj, pjesëmarrja në votime ka qenë 64%.