Arabia Saudite kërcënon SHBA-të

Arabia Saudite kërcënoi të shesë naftën e saj me valuta të ndryshme nga dollari nëse Shtetet e Bashkuara kalojnë një projekt-ligj që lejon hapjen e padive "antitrust" në gjykatat e SHBA kundër anëtarëve të OPEC.

Nëse Shtetet e Bashkuara shkelin imunitetin sovran të shteteve të OPEC dhe ankohen për shkelje të antitrustit, zyrtarët e energjisë në Riad janë gati të shesin naftën e tyre me valuta të tjera veç dollarit, bëhet e ditur sipas disa burimeve të afërta me qarqet vendimmarrëse të politikës energjetike saudite, një nga të cilat i tha Reuters se zyrtarët e lartë të energjisë në SHBA tashmë ishin informuar. "Sauditët e dinë se nëpërmjet petrodollarit kanë një armë të fuqishme si një bombë bërthamore ", tha një burim, ndërsa një tjetër citonte sauditët duke thënë: "Le të miratojnë amerikanët ligjin NOPEC dhe ky do të jetë falimentimi i ekonomisë amerikane. " Një vendim i tillë mund të vënë në pikëpyetje statusin e dollarit amerikan si një monedhë rezervë në botë, veçanërisht pasi anëtarët e tjerë të OPEC, veçanërisht Irani dhe Venezuela, kanë arsyet e tyre për të braktisur petrodollarin dhe se prodhuesit e naftës jo-OPEC, si Rusia, janë gjithashtu në gjendje të marrin në konsideratë një masë të tillë.