Turqia do të vazhdojë tregtinë me Iranin pavarësisht kërcënimeve të SHBA

Presidenti turk Rexhep Tajip Erdogan tha se vendi i tij do të vazhdojë të bëjë tregti me Iranin megjithë kërcënimet e sanksioneve nga Shtetet e Bashkuara, duke argumentuar se është e pamundur që Ankaraja të ndalojë importin e naftës dhe gazit iranian.

Sipas transmetuesit turk NTV, duke folur para gazetarëve për vizitën e tij në Nju Jork, ku mori pjesë në Asamblenë e 74-të të Përgjithshme të Kombeve të Bashkuara, Erdogan tha se Ankaraja nuk kishte frikë nga ndëshkimet e mundshme ekonomike dhe do të mbante lidhjet me fqinjin lindor të saj. Turqia është shumë e varur në energji dhe produkte petrokimike të importuara nga Irani. Të dy fqinjët kishin një vëllim të madh në tregtinë bilaterale përpara sanksioneve, duke vendosur një shkëmbim prej 30 miliardë dollarësh. Sanksionet, megjithatë, e kanë mbajtur tregtinë e përgjithshme Iran-Turqi në rreth 12 miliardë dollarë në vit.