Britani, të mërkurën shpërndahet parlamenti

Kabineti britanik është mbledhur për herë të fundit para zgjedhjeve të parakohshme të 12 dhjetorit.

Në prag të nisjes së fushatës njëmujore elektorale, kryeministri Boris Xhonson tha të martën se janë krenarë për 100 ditët e para në detyrë, dhe se çështja e Brexit do të zgjidhet vitin e ardhshëm. "Zgjedhja për vendin është e qartë. A doni të avancojmë axhendat dhe të realizojmë Brexit dhe gjërat e tjera fantastike në vitin 2020, apo doni ta konsumoni vitin e ri me dy referendume, njërin për Bashkimin Europian dhe tjetrin që rrezikon ndarjen e Mbretërisë sonë të Bashkuar," pyeti Xhonson ministrat. Lideri i opozitës, laburisti Xheremi Korbin, akuzoi kundërshtarin se po konsultohet në fshehtësi me Uashingtonin që pas daljes nga BE-ja, të aplikojë një model ekonomik të ngjashëm me atë amerikan. "Shihni sa të pamëshirshme janë korporatat në SHBA. Ne e dimë se duan të futen në sistemin tonë të shëndetësisë dhe të ngrenë çmimet e medikamenteve për pacientët. Këtë rezultat sjell Brexiti i Partisë Konservatore dhe prandaj ne kërkojmë që vendimi të lihet në dorën e votuesve," deklaroi Korbin. Në sondazhet paraprake për zgjedhjet e 12 dhjetorit, laburistët e kanë ngushtuar epërsinë e konservatorëve në 7 për qind, liberaldemokratët renditen të tretët të ndjekur nga grupimi Brexit.