Pandemia po ndryshon natyrën e ushtrisë amerikane?

Televizioni CNN po shqyrton ndikimin e pandemisë së koronavirusit në natyrën e ushtrisë së Shteteve të Bashkuara.

Në një artikull të botuar të Dielën, 26 Prill, në uebfaqen e CNN, Barbara Starr, korrespodentja e këtij kanali në Pentagon, shqyrtoi se si pandemia e koronavirusit mund të ndryshojë natyrën e ushtrisë. Dr. Anthony Fauci dhe Dr. Deborah Birx, dy nga këshilltarët kryesorë të presidentit amerikan Donald Trump për koronavirusin, udhëtuan për në Pentagon të enjten për t'u takuar me gjeneral Mark Milley, Shefin e Shtabit të Mbrojtjes të Shteteve të  Bashkuara, për të diskutuar përpjekjet e ushtrisë për të menaxhuar pandeminë e koronavirusit dhe ekspertizën mjekësore të nevojshme për të mbrojtur 1.4 milion anëtarë të personelit ushtarak amerikan. Zyrtarët e pranishëm në takim nxorën në pah një problem kritik të sigurisë kombëtare, i cili nuk u diskutua në detaje nga presidenti; sfida e sigurimit që ushtria është e gatshme për të luftuar pandeminë. Ndërsa Shtetet e Bashkuara përgatiten për një valë të dytë të mundshme të koronavirusit këtë vjeshtë, pengesat me të cilat përballet Pentagoni janë shumë të mëdha. Dhe përtej mirëmbajtjes së funksionimit ushtarak, ekziston një vetëdije se pandemia mund të prishë gjeopolitikën dhe të krijojë kërcënime të reja të paparashikueshme për sigurinë kombëtare të Shteteve të Bashkuara. Një nga treguesit më të qartë të nivelit të shqetësimit brenda Pentagonit është fakti që Sekretari i Mbrojtjes Mark Esper ka vendosur kufij të rreptë mbi informacionin e ndarë me publikun amerikan. Edhe pse Pentagon boton informacione të përditshme mbi numrin e anëtarëve të stafit që rezultuan pozitiv me koronavirusi, ushtria nuk publikon informacione që beson se zbulojnë dobësi në gatishmërinë e SHBA-ve, çka mund të shfrytëzohej nga kundërshtarët. Ka shumë arsye për t'u shqetësuar ndërsa kriza e koronavirusit vazhdon. Virusi e detyroi ushtrinë amerikane të anulojë stërvitjet, ndaloi shkurtimisht procesin e rekrutimit dhe e ktheu aeroplanmbajtësen Roosvelt në port pasi më shumë se 800 marinsa u testuan pozitivë dhe një prej tyre vdiq. Tani më shumë se 40 anije luftarake të marinës amerikane kanë pasur një ose më shumë marinsa pozitivë, dhe të Premten, CNN mësoi se kishte të paktën 18 raste në bordin e USS Kidd, e cila është në Paqësorin Lindor dhe tani duhet të gjejë një port. Numri i rasteve ishte rritur në 33 të Shtunën, sipas Marinës së SHBA. Ka pothuajse 4,000 raste midis forcave të detare aktive, por epidemia në bordin e Roosvelt ka shkaktuar ankthin më të madh në komunitetin mjekësor ushtarak. Përtej objektivit praktik të ruajtjes së gatishmërisë, ka një bindje në rritje që natyra e ushtrisë së Shteteve të Bashkuara, ajo që ajo bën dhe koncepti i asaj që përbën një kërcënim për sigurinë kombëtare, mund të ndryshohet nga pandemia. "A do të rinisë gjithçka si zakonisht? Jo, nuk mendoj kështu, "tha Milley në fillim të këtij muaji në Pentagon. Kur u pyet se çfarë do të ndodhte më pas, Milley sugjeroi që pandemia do të thotë se natyra e kërcënimeve ndaj Shteteve të Bashkuara po ndryshon. Kjo është sfida, Pentagoni do të duhet të parashikojë dhe të reagojë me shkathtësi, pasi kërcënimi tjetër i madh mund të mos vijë nga Kina apo Rusia. Mund të jetë një pandemi tjetër, një sulm në internet apo edhe një ndryshim klimatik që paralizon një ushtri që akoma varet nga miliarda dollarë në shpenzimet për luftanijet, aeroplanët, tanket dhe raketat e saj.