Пизишкиён: Ҳамла ва таҳримҳои ҳамзамон бо иддаои музокирот фиребкорӣ аст

Порс Тудей – Раиси ҷумҳурии Эрон бо ишора ба иқдомоти Амрико алайҳи Эрон изҳор дошт, ки ҳамлаҳо ва таҳримҳои ҳамзамон бо иддаои музокирот, як навъ фиребкорӣ маҳсуб мешавад.

Ба гузориши Порс Тудей  ба нақл аз хабаргузории Садо ва Симои Ҷумҳурии Исломии Эрон (IRIB), Масъуди Пизишкиён, раиси ҷумҳури Эрон, рӯзи душанбе бо Арарат Мирзоян, вазири корҳои хориҷӣ ва тиҷорати байналмилалии Арманистон дидор кард. Ӯ бо ишора ба равобити олӣ ва дӯстонаи миёни ду кишвар, ибрози умедворӣ намуд, ки ин равобит дар тамоми бахшҳо бештар густариш ёбад.

Раиси ҷумҳур бо таъкид бар ҷойгоҳи мусбати арманиҳо дар Эрон қайд кард, ки арманиҳои сокини ин кишвар ҳамеша ҳамчун афроди мӯътабар ва дурусткор шинохта шудаанд ва ин таърихи мусбат сармояи арзишманд дар равобити миёни ду миллат ба шумор меравад.

Дар бахши дигаре аз суҳбатҳояш, Пизишкиён бо ишора ба таҳаввулоти ахири минтақа ва вазъияти ҳассоси кунунӣ гуфт: "Мушкили мо бо Амрико ин аст, ки ҳар вақт мо сари мизи музокирот менишинем, фавран ҷанг ба мо таҳмил мешавад. Мо пас аз музокирот се бор мавриди ҳамла қарор гирифтаем; ин нишон медиҳад, ки онҳо дар пайи гуфтугӯ нестанд, балки ҳадафашон сарнагун кардани Ҷумҳурии Исломии Эрон аст." Ӯ афзуд: Ҷумҳурии Исломии Эрон борҳо садоқати худро дар фаъолиятҳои ҳастаӣ собит кардааст ва кишвари мо таҳти густардатарин назорати Оҷонси Байналмилалии Энержии Атомӣ (IAEA) дар ҷаҳон қарор доштааст; бо вуҷуди ин, Иёлоти Муттаҳида бар асоси иддаоҳои беасос ба Эрон фишор меорад.

Раиси ҷумҳурии Эрон дар идома гуфт: Ман дар суханронии худ дар Созмони Милали Муттаҳид омодагии худро барои гуфтугӯ ва санҷиши фаъолиятҳои ҳастаиамон эълон кардам; аммо мушкил ин ҷост, ки ҳар вақт нозирон аз Эрон боздид кардаанд, таъсисоти ҳастаӣ ва донишмандони мо шиносоӣ шудаанд, ки ин амр баъдан боис ба бомбборони он таъсисот ва террор шудани донишмандони мо гардидааст. Бар асоси кадом мантиқ бояд марказҳои илмӣ ва академии мо бомбборон шаванд? Ин дар ҳолест, ки тибқи ҳуқуқи байналмилалӣ, ҳамла ба иншооти ҳастаие, ки таҳти назорати Агентии байналмилалии энергияи атомӣ (МАГАТЭ) қарор доранд, иҷозат дода намешавад.

Пизишкиён аъмоли ҷинояткоронаи Амрико — ҳамла ба Эрон ва ҳамзамон даъват ба музокирот —ро намунаи дурӯягии онҳо дониста, изҳор дошт: «Онҳо барои ҷинояти куштори 168 кӯдаки бегуноҳ аз Миноб ҳеҷ гуна тавзеҳот намедиҳанд, аммо шарм намедоранд ва ҳамчунон иддаои ҳимоят аз ҳуқуқи башарро доранд. Мушкили имрӯзаи мо ҷаҳонест, ки худро мутамаддин мехонад, аммо дар амал ба ваҳшоният рӯ овардааст».

Президенти Эрон бо таъкид бар ин ки ҳеҷ кадом аз иқдомот ё рафтори онҳо нисбат ба Эрон бо меъёрҳои ҳуқуқи байналмилалӣ мувофиқат намекунад, афзуд: «Музокирот бо рақибе, ки ҳамарӯза ба куштор, таҳрим, фишор ва таҳдид даст мезанад ва уҳдадориҳои худро нақз мекунад, бемаънӣ аст; миллати мо низ чунин равишро рад мекунад». Дар ҷараёни ин дидор, вазири корҳои хориҷӣ ва савдои байналмилалии Арманистон бо таъкид бар дӯстӣ ва равобити рӯ ба тавсеаи миёни Эрон ва Арманистон изҳор дошт: «Ҳамкории ду кишвар дар арсаи байналмилалӣ хуб пеш меравад ва бо вуҷуди таҳримҳо, мо ҳамкориҳои худро бо Эрон бо ҷиддият идома медиҳем».

Вазир бо ишора ба равиши сулҳҷӯёнаи Арманистон афзуд: «Арманистон кишвари сулҳдӯстест, ки барои расидан ба сулҳ талош мекунад — роҳе, ки албатта, осон нест».

Дар поён, вазир қайд кард: «Мо талош дорем, ки ҳамкориҳои ду кишварро дар чаҳорчӯби масири муаяншуда бештар густариш диҳем».