Guterreş we Aragçiniň Gazadaky we Liwandaky wakalar barada söhbetdeşligi

Eýran Yslam Respublikasynyň Daşary işler ministri we Birleşen Milletler Guramasynyň Baş sekretary, Birleşen Milletler Guramasynyň Medeniýetler Bileleşiginiň Bütindünýä Assambleýasynyň onunjy ýygnagynyň çäginde Portugaliýada duşuşdy we maslahatlaşdy.

"Mehr" habar gullugynyň habaryna görä, Eýranyň Daşary işler ministri Seýid Abbas Aragçi we BMG-nyň Baş sekretary Antonio Guterreş sebitdäki we halkara özgerişler, şol sanda Gazadaky we Liwandaky wakalar barada pikir alyşdylar.

Bu duşuşykda Aragçi, Eýran Yslam Respublikasynyň siwilizasiýalaryň we medeniýetleriň arasyndaky gepleşik meselesini öňe sürmekdäki roluna ünsi çekdi we halkara meselelerini çözmek üçin gepleşikleriň we özara gatnaşyklaryň zerurdygyny aýtdy.

Eýran Yslam Respublikasynyň Daşary işler ministri Gazadaky we Liwandaky ynsanperwer ýagdaýyň hem agyrdygyny aýtmak bilen Birleşen Milletler Guramasynyň Baş sekretaryna Gaza we Liwanda Ysraýyl režiminiň genosidini we agressiýasyny duruzmak üçin sebitdäki ýurtlar bilen soňky gatnaşyklary we geňeşmeleri barada habar berdi.

Birleşen Milletler Guramasynyň Baş sekretary bu duşuşykda sebitdäki häzirki ýagdaýa alada bildirdi.

Birleşen Milletler Guramasynyň Medeniýetler Bileleşiginiň Bütindünýä Assambleýasynyň 10-njy mejlisine gatnaşmak üçin Lissabona giden Eýranyň Daşary işler ministri Seýid Abbas Aragçiniň   şu wagta çenli Ispaniýanyň, Alžiriň, Bosniýanyň we Gersegowinanyň, Sloweniýanyň we Tunisiň daşary işler ministrleri bilen duşuşyp pikir alyşandygyny bellemelidiris.