İranın milli təhlükəsizliyinin ən mühüm dayağı xalqdır

İranın Milli Təhlükəsizlik Ali Şurasının katibi Möhsün Rzayi xarici təcavüzün 200-cü günü münasibətilə xalqa müraciətində bildirib ki, İranın milli təhlükəsizliyinin ən mühüm dayağı təhlükə anında vətənin müdafiəsinə qalxan xalqın həmrəyliyi və müqavimətidir.

Böyük, tarix yaradan və inqilabçı İran xalqı!

 Bu gün əziz vətənimiz İrana qarşı xarici təcavüzün 200-cü günü tamam olur. Siz, əziz İran xalqı, müasir tariximizin ən həssas mərhələlərindən birində vətənin qorunması və onun şərəfinin ucaldılması üçün müqavimət göstərmisiniz. Bu 200 günü yalnız təhlükəsizlik hadisəsi və ya hərbi qarşıdurma çərçivəsində qiymətləndirmək olmaz. Bu günlər və qarşıdakı günlər İranın şərəfli tarixinin bir hissəsidir və son iki əsrin bir çox dövründən fərqli xüsusiyyətlərini ortaya qoyur.

 Son iki əsrdə İran dəfələrlə xarici təcavüz, işğal və müdaxilələrə məruz qalıb. Bəzi dövrlərdə milli gücün zəifliyi və birlik çatışmazlığı məğlubiyyətlərə, işğala, ədalətsiz müqavilələrin qəbul edilməsinə və torpaqlarımızın bir hissəsinin itirilməsinə səbəb olub. Bu tarixi təcrübə bizə öyrədib ki, ölkə yalnız xalq İranı öz ölkəsi hesab etdikdə və onun qorunması üçün ayağa qalxdıqda xarici güclərin təhdidlərindən qoruna bilər.

 Bu gün isə əminliklə demək olar ki, tarix təkrarlanmadı. Bu 200 gün ərzində İran xalqı xarici təcavüz qarşısında bütün varlığının İran olduğunu göstərdi. Siz öz iştirakınız, səbriniz və müqavimətinizlə yalnız ölkənin ərazi bütövlüyü və müstəqilliyini müdafiə etmədiniz, həm də səkkizillik Müqəddəs Müdafiə dövründə olduğu kimi, İranın milli gücünün və çəkindirmə qabiliyyətinin əsas dayağına çevrildiniz.

 Siz, məğlubedilməz və qəhrəman İran xalqı, dəfələrlə süni qarşıdurmaları aradan qaldıraraq, nümunəvi həmrəyliyinizi dünyaya nümayiş etdirmisiniz. Bu gün də həmin süni qarşıdurmaları bir daha rədd edəcəksiniz.

Bu 200 gün yalnız bir təcavüzə cavab deyildi; eyni zamanda İranın son iki əsrlik yaddaşında qalan yaraların bir qisminin sağaldılması üçün tarixi fürsət oldu. Keçmişdə dəfələrlə torpaqlarının işğalına və xarici qüvvələrin iradəsinin zorla qəbul etdirilməsinə şahid olan bir xalq bu dəfə həmin tarixin təkrarlanmasına imkan verməyəcəyini göstərdi.

 Bu gün İranın milli təhlükəsizliyinin hərbi güc, iqtisadi və diplomatik imkanlarla yanaşı, ən mühüm sərvəti təhlükə anında vətəndən başqa heç nə düşünməyən xalqdır. Hamımızın vəzifəsi bu milli sərvəti qorumaq, gücləndirmək və onu İranın təhlükəsizliyi, müstəqilliyi və qüdrəti üçün davamlı dayağa çevirməkdir.

 Əziz İran xalqı! Bu gecələrdə yaratdığınız dastan İran tarixində əbədi qalacaq. Müqavimətin 200-cü günündə İran xalqının qarşısında baş əyirik; müasir tariximizin ən çətin mərhələlərindən birində vətənin, rəhbərliyin və İslam İnqilabının yanında dayanan xalqın qarşısında.

Vətənin əsgəri

Möhsün Rzayi