İsraili tənqid edənləri susdurmaq Konstitusiyaya ziddir

Kaliforniyada federal hakim bildirib ki, Donald Tramp administrasiyasının İsrail rejiminin Qəzzaya qarşı həyata keçirdiyi əməlləri və müharibəni tənqid edən xarici vətəndaşları və xarici tələbələri ölkədən çıxarması Konstitusiyaya ziddir.

“Pars Today”in verdiyi xəbərə görə, Noel Uayz qərarında İsraili tənqid edənlərin ABŞ hökuməti tərəfindən susdurulmasının Konstitusiyaya zidd olduğunu bildirib.

Hakim yazıb: “Əgər biz yalnız hökumət və onun liderləri haqqında müsbət fikirlərimizi ifadə etməkdə azad olsaq, söz azadlığı bir illüziyadan başqa bir şey deyil. Söz və mətbuat azadlığı ‘davamlı Amerika demokratiyasının təməlidir’.”

“Stanford Daily” qəzetinin baş redaktoru Corc Porteus bu qərara cavab olaraq X sosial şəbəkəsində yazıb: “Jurnalistlərimiz xəbər hazırladıqları üçün narahat olmamalıdırlar. Bugünkü qələbə o deməkdir ki, onlar artıq qorxu içində olmayacaqlar.”

Donald Tramp administrasiyası xarici tələbələrin təcrübə proqramlarına nəzarəti gücləndirərək ABŞ universitetlərinə xəbərdarlıq edib ki, qaydalara zidd iş icazələri verildiyi təqdirdə onların beynəlxalq tələbələri qəbul etmək hüququ ləğv edilə bilər.

Tramp administrasiyası son aylarda Harvard kimi universitetlərə qarşı genişmiqyaslı təzyiqlər göstərib və bu təhsil müəssisələrini həddindən artıq liberalizmdə və antisemitizmin yayılmasında ittiham edib. Bu tədbirlər genişmiqyaslı miqrasiya təzyiqləri ilə yanaşı, çoxsaylı xarici tələbəni deportasiya və ya vizalarının uzadılmaması təhlükəsi ilə üz-üzə qoyub.

Tramp həmçinin mediada artan tənqidlərə cavab olaraq CNN-in rəhbərliyinin və aparıcılarının dəyişdirilməsini tələb edib.

ABŞ Prezidenti Donald Tramp şənbə günü “Truth Social” sosial şəbəkəsində yazıb: “CNN ölüm spiralındadır. MS NOW (MSNBC-nin yeni adı) da eyni vəziyyətdədir. Həqiqətən də, demək olar ki, heç kim bu iki şəbəkənin heç birinə baxmır!”

ABŞ prezidenti əlavə edib: “CNN-in ən yaxşı siması sorğuçu və ictimai rəy analitiki Harri Entendir. Çünki o, Donald Trampın Abraham Linkoln, Corc Vaşinqton və ya hər hansı digər prezidentdən 6 dəfə daha populyar olduğunu göstərməyə hazır idi. Onun etibarlılığı var (onu işdən çıxarmayın!).”