رئیس شورای عالی مصالحه ملی افغانستان به «دوشنبه» سفر می‌کند
-
رئیس شورای عالی مصالحه ملی افغانستان به «دوشنبه» سفر می‌کند
در دیدار سفیر تاجیکستان در «کابل» با رئیس شورای عالی مصالحه ملی افغانستان موضوع سفر «عبدالله عبدالله» به «دوشنبه» مورد بررسی قرار گرفت.
به گزارش خبرنگار رادیودری، «سعدی شریفی» سفیر تاجیکستان در کابل با «عبدالله عبدالله» رئیس شورای عالی مصالحه ملی افغانستان دیدار و گفت‌وگو کرد.
در جریان این ملاقات موضوع سفر قریب الوقوع رئیس شورای عالی مصالحه ملی افغانستان به تاجیکستان و بعضی مسائل همکاری میان دو کشور دوست مورد بررسی قرار گرفت.
عبدالله، تاجیکستان را همسایه دوست و برادر افغانستان عنوان کرد و ابراز امیدواری نمود که سفر وی و هیئت همراش به این کشور دستاوردهای زیادی در بر خواهد داشت.
شریفی به نوبه خود با اشاره به پشتیبانی تاجیکستان از دولت و مردم افغانستان در همه زمینه ها سفر آتی عبدالله به «دوشنبه» را زمینه ساز گسترش بیشتر روابط بین دو کشور برادر خواند.
در بخش دیگری این دیدار در مورد وضعیت کنونی افغانستان، تحولات در روند صلح و مذاکرات بین‌الافغانی تبادل نظر صورت گرفت.
