دیدار رئیس شورای عالی مصالحه با رییس‌جمهوری تاجیکستان
-
دیدار رییس شورای عالی مصالحه با رییس‌جمهوری تاجیکستان
رئیس شورای عالی مصالحه افغانستان در سفرش به دوشنبه با رئیس جمهوری تاجیکستان دیدار و در مورد صلح افغانستان گفتگو کرد.
به گزارش خبرنگار رادیو دری، طبق اعلامیه شورای عالی مصالحه، امام‌علی رحمان در گفتگو با عبدالله ابراز امیدواری کرده که تلاش‌های صلح در افغانستان نتیجه بدهد.
رحمان افغانستان را از دوستان و متحدان نزدیک تاجیکستان خواند و تاکید کرد، این روابط ریشه در همسایگی، مشترکات تاریخی، فرهنگی و دینی دارد.
امام‌علی رحمان با اعلام حمایت همه‌جانبه کشورش از تلاش‌های صلح در افغانستان، صلح و ثبات در افغانستان را صلح و ثبات در تاجیکستان، منطقه و فراتر از منطقه عنوان کرد.
او افزود افغانستان، تاجیکستان و منطقه از دهشت‌افگنی، افراط‌گرایی و بی‌ثباتی متضرر شده‌اند و صلح و ثبات در افغانستان زمینه گسترش و توسعه تجارت در منطقه و اتصال آسیای مرکزی به جنوب آسیا را فراهم می‌کند.
در اعلامیه شورای عالی مصالحه آمده‌است عبدالله در گفتگو با امام‌علی رحمان درباره تلاش‌های صلح، مذاکرات دوحه، دور بعدی مذاکرات، سفرهای اخیر برای کسب اجماع منطقه‌ای و نقش تاجیکستان در تأمین صلح در افغانستان رایزنی کرده‌است.
عبدالله دیروز با صدر اعظم و رییس مجلس نمایندگان تاجیکستان نیز در مورد روند صلح افغانستان گفتگو کرده بود.
رییس شورای عالی مصالحه برای جلب حمایت منطقه از روند صلح افغانستان در سفری به تاجیکستان رفته است.
این چندمین سفر منطقه‌ای عبدالله در مورد روند صلح به کشورهای همسایه و منطقه است.
او پیش از این به کشورهای پاکستان، ایران، هند، ازبکستان و ترکیه سفر کرده‌است.
