امام‌علی رحمان: از روند صلح به رهبری دولت افغانستان حمایت می کنیم
-
امام‌علی رحمان: از روند صلح به رهبری دولت افغانستان حمایت می کنیم
رئیس‌جمهور تاجیکستان در گفت‌وگو با همتای افغان خود، حمایت خود را از دیدگاه‌ها و برنامه‌های دولت افغانستان در زمینه اتصال منطقه‌ای و روند صلح به رهبری و مالکیت افغان‌ها ابراز کرد.
به گزارش رادیو دری به نقل از خبرگزاری فارس، ارگ ریاست جمهوری افغانستان اعلام کرد اشرف غنی پیش از ظهر امروز پنج‌شنبه با امام‌علی رحمان، رئیس‌جمهور تاجیکستان، به‌صورت تلفنی گفت‌وگو کرد.
در این گفت‌وگوی تلفنی، سران دو کشور در مورد گسترش روابط دوجانبه، روند صلح افغانستان و همکاری‌های منطقه‌ای بحث و تبادل نظر کردند.
رئیس‌جمهور تاجیکستان در این گفت‌وگو حمایت خود را از دیدگاه‌ها و برنامه‌های دولت افغانستان در زمینه اتصال منطقه‌ای و روند صلح به رهبری و مالکیت افغان‌ها اعلام کرد.
همچنین روسای جمهور دو کشور بر گسترش همکاری‌های اقتصادی، تجاری و مرزی نیز تاکید کردند.
در ادامه این گفت‌وگو رحمان از اشرف غنی برای شرکت در بیستمین سالگرد تاسیس سازمان همکاری‌های شانگهای که قرار است در ماه مارچ در تاجیکستان برگزار شود نیز دعوت کرد.
افغانستان و تاجیکستان پس از سقوط حکومت طالبان دارای روابط نزدیک در زمینه‌های اقتصادی بوده و کابل بخشی از انرژی برق مورد نیاز خود را از این کشور خریداری می‌کند.
