امضای پنج سند همکاری بین افغانستان و تاجیکستان
-
امضای پنج سند همکاری بین افغانستان و تاجیکستان
پنج سند همکاری بین تاجیکستان و افغانستان در پایان دیدار روسای جمهوری دو کشور امضاء شد.
به گزارش رادیودری، این پنج سند همکاری شامل موضوعات همچون اقتصادی، سیاسی، مبارزه با تروریسم و قاچاق مواد مخدراست.
دفتر ریاست جمهوری افغانستان هم در بیانیه ای اعلام کرد، «محمد اشرف غنی» رئیس جمهوری افغانستان در دیدار با « امام علی رحمان» رییس جمهوری تاجیکستان در شهر دوشنبه پایتخت این کشور بر گسترش همکاری های دوجانبه درزمینه های مختلف تجاری و ترانزیتی، امنیتی، فرهنگی، انرژی بین دو کشور تاکید کرد.
اشرف غنی از موضع تاجیکستان درحمایت از روند صلح افغانستان قدردانی کرد.
امام علی رحمان هم در این دیدار گفت: تاجیکستان خواهان بازگشت آرامش و صلح و ثبات در افغانستان بوده و در این راستا از هر نوع کمک ممکن دریغ نخواهد کرد.
روسای جمهوری تاجیکستان و افغانستان همچنین ابراز اطمینان کردند، کنفرانس «قلب آسیا - روند استانبول» به فرآیند صلح و ثبات در افغانستان و بازسازی اقتصادی این کشور کمک خواهد کرد.
وزارت خارجه افغانستان هم اعلام کرد: «محمد حنیف اتمر» وزیر امور خارجه افغانستان در دیدار با «محمد جواد ظریف» وزیر امور خارجه ایران از موضع سازنده ایران در قبال روند صلح افغانستان استقبال کرد وآن را مهم و ارزشمند دانست.
شهر دوشنبه (پایتخت تاجیکستان) از روزدوشنبه ( 29 مارس) میزبان کنفرانس "قلب آسیا" با موضوع افغانستان است.
