جنگ در افغانستان؛ محور گفتگوی «اشرف غنی» و «امامعلی رحمان»

روسای جمهوری افغانستان و تاجیکستان درباره تشدید جنگ در افغانستان بصورت تلفنی گفتگو کردند.

به گزارش رادیودری، همزمان با تشدید جنگ در شمال و شمال شرق افغانستان و هم مرز با تاجیکستان، روسای جمهوری افغانستان و تاجیکستان، بعدازظهر روز یک شنبه درباره آخرین تحولات درگیری ها در افغانستان و همچنین اوضاع مرزی دو کشور رایزنی کردند.

 «محمد اشرف غنی» رییس جمهوری افغانستان و«امامعلی رحمان» رئیس جمهوری  تاجیکستان در مورد آن عده از شهروندان افغان که براثر خشونت‌های طالبان در مناطق مرزی با تاجیکستان به این  کشور پناه برده اند هم  تبادل نظر کردند.

رئیس جمهوری تاجیکستان از وضعیت پیش آمده کنونی افغانستان ابراز نگرانی کرد و متقابلا رئیس جمهور افغانستان ضمن قدردانی از حسن نیت و حس بشردوستانه کشور همسایه تاجیکستان در برابر شهروندان افغان گفت: دولت افغانستان در قبال شهروندان خود مسئول است و به زودترین فرصت، اقدامات لازم و فوری را برای رسیدگی به آنان انجام خواهد داد.

صدها نظامی و غیر نظامی افغان پس از حملات طالبان به ولایت های شمالی افغانستان  به تاجیکستان پناهنده شدند.

گروه طالبان با حمله به ولایت بدخشان در شمال شرق افغانستان هم مرز با تاجیکستان دستکم ده ولسوالی این ولایت را تصرف کرده اند که بر اثر آن حدود هفت هزار خانواده افغان آواره شده اند.

آمریکا و متحدانش در سال 2001 به بهانه مبارزه با تروریسم و تامین امنیت در افغانستان به این کشور حمله کردند و این اشغالگری باعث  جنگ، درگیری و نابودی زیر بناهای اقتصادی افغانستان شده و ناامنی، تروریسم، آوارگی و تولید مواد مخدر هم افزایش یافته است.

با این همه مشکلات مردم افغانستان، آمریکا  پس از 20 سال حضور نظامی در افغانستان اعلام کرد، نیروهایش را تا 11 سپتامبر 2021 (20سنبله) از افغانستان خارج می کند.

اوضاع افغانستان محور گفت‌وگوی «رحمان» و «غنی»