Pars Today

ارگ ریاست جمهوری افغانستان از معرفی رئیس جدید عمومی دفتر ریاست جمهوری این کشور خبر داد.

به گزارش رادیو دری،  ارگ ریاست جمهوری افغانستان امروز شنبه (۲۶ سرطان) نوشت: رئیس جمهور محمد اشرف غنی، ظهر امروز عبدالمتین بیک را به حیث رئیس عمومی دفتر مقام عالی ریاست جمهوری، رسماً معرفی کرد.

ارگ ریاست جمهوری افغانستان گفته است، که رئیس جمهور غنی ضمن ابراز امتنان از کارکردهای محمد شاکر کارگر رئیس پیشین ریاست عمومی دفتر مقام عالی، از عبدالمتین بیک بخاطر اینکه در این شرایط حساس، مسئولیت مهم را پذیرفت، تشکر کرد.

ارگ نوشته است، که رئیس جمهور کشور خطاب به عبدالمتین بیک گفت، که شما تجربه لازم در امنیت ملی، ارگان های محلی و هیأت مذاکره کنندۀ جمهوری اسلامی افغانستان دارید.

وی پیش از این در سمت های مشاور ارشد امور سیاسی و مردمی مقام عالی ریاست جمهوری، رئیس عمومی اداره ارگان‌های محلی، معاون ولایتی ریاست عمومی امنیت ملی، معین مالی و اداری اداره ارگان‌های محلی و مشاور وزارت امور داخله انجام وظیفه نموده است.