تاجیکستان برای به رسمیت شناختن دولت آینده افغانستان شرط گذاشت
-
تاجیکستان برای به رسمیت شناختن دولت آینده افغانستان شرط گذاشت
رییس جمهوری تاجیکستان تاکید کرد: کشورش هر دولتی را که با ظلم و ستم و بدون در نظر گرفتن موقعیت همه مردم افغانستان به ویژه اقلیت‌های قومی آن در این کشور تاسیس شود به رسمیت نخواهد شناخت.
به گزارش رادیو دری، رحمان امروز در دیدار «شاه محمود قریشی» وزیر امور خارجه پاکستان در دوشنبه افزود: ساختار دولت در افغانستان باید از طریق همه پرسی و با در نظر گرفتن موقعیت همه شهروندان این کشور تعیین شود .
رحمان همچنین هر نوع بی‌قانونی، قتل، غارت و آزار و اذیت علیه مردم افغانستان به ویژه تاجیک‌ها، ازبک‌ها و دیگر اقلیت‌های ملی را به شدت محکوم کرد و ادامه داد: تاجیکستان به عنوان همسایه نزدیک افغانستان همیشه از احیای صلح و ثبات پایدار در این کشور حمایت می کند و به این موضع خود پایبند است.
در این دیدار «شاه محمود قریشی» وزیر امور خارجه پاکستان و «امامعلی رحمان» رییس جمهوری تاجیکستان وضعیت فعلی در افغانستان را تهدیدی بزرگ برای امنیت منطقه‌ای دانستند.
دو طرف همچنین روی کار آمدن طالبان را سبب پیچیده شدن ژئوپلیتیک منطقه عنوان و اظهار کردند: شواهد نشان می‌دهد که طالبان از وعده‌های قبلی خود برای تشکیل دولت موقت انتقالی با مشارکت گسترده دیگر نیروهای سیاسی دست کشیده است.
رییس جمهوری تاجیکستان و وزیرخارجه پاکستان هشدار دادند که بی توجهی جامعه جهانی به وضعیت کنونی افغانستان می‌تواند منجر به طولانی شدن جنگ داخلی در این کشور شود.
