طالبان نظامیانش را در مرز تاجیکستان مستقر کرده است

در حالی که روسیه از افزایش تنش میان طالبان و تاجیکستان به شدت ابراز نگرانی کرده، واحدهای نظامی انتحاری طالبان در ولایت های هم مرز با تاجیکستان مستقر شده‌اند.

به گزارش رادیو دری؛ عبدالباسط بدر مسوول قطعه نظامی کندک «انتحاری» طالبان به رسانه‌ها گفته است که نیروهای این کندک به زودی برای انجام وظیفه در ولسوالی اشکاشم مستقر خواهند شد.

او افزود: این قطعه با سلاح‌های روسی ام  4، ام 16 ، پیکا و راکت و سلاح‌های سبک و سنگین مجهز است.

طالبان پیش از این نیز از مستقرشدن شاخه کندک نظامی «انتحاری» خود در ولایت قندوز در مرز تاجیکستان خبر داده بود.

به تازگی مقام‌های روسیه از افزایش تنش میان طالبان و تاجیکستان ابراز نگرانی کرده اند و می‌گویند کابل و دوشنبه باید برای حل تنش‌ها در مرز تاجیکستان و افغانستان راه‌حلی قابل قبول جستجو کنند.

طالبان به اظهارات امام‌علی رحمان رییس جمهوری تاجیکستان که خواستار تشکیل دولت فراگیر در افغانستان شده بود، واکنشی تند نشان دادند.

ملا عبدالغنی برادر معاون اول رییس دولت طالبان گفته‌است: تاجیکستان در امور داخلی افغانستان مداخله می‌کند و طالبان به کشورهای همسایه اجازه نخواهد داد که در افغانستان درگیری فرقه‌ای و قومی به راه‌اندازند.

رییس جمهوری تاجیکستان بر تشکیل دولت فراگیر با حضور گسترده تاجیک‌ها تاکید دارد.

امامعلی رحمان خواستار تشکیل دولت فراگیر در افغانستان شد

لشکرکشی تاجیکستان و طالبان در برابر هم