حمله راکتی از خاک افغانستان علیه تاجیکستان؛داعش پذیرفت

مقام‌های تاجیکستانی ادعا کرده‌اند که نقاط مرزی این کشور از خاک افغانستان مورد حمله موشکی قرار گرفته است.

رسانه‌های تاجیکستانی روز شنبه، ۱۷ ثور، به نقل از مقام‌های امنیتی این کشور گفته‌اند که چهار موشک دست‌ساز از نوع  BM-1 از ولسوالی خواجه‌غار ولایت تخار به سمت تاجیکستان شلیک شده است.این رسانه‌ها به نقل از طالبان گفته‌اند که این کار داعش بوده است، اما مقام‌های محلی تاجیکستان در مرز افغانستان ادعا کرده‌اند که کار جماعت انصارالله، شبه‌نظامیان مخالف دولت این کشور، است.

براساس گزارش رسانه‌های تاجیکستانی، مرزبانان این کشور پس از شلیک موشک‌، به سوی آنان آتش گشودند که موتر حامل آنان سوخته است، اما به خودشان آسیبی نرسیده است.

گفته می‌شود این دومین حمله موشکی از خاک افغانستان به کشورهای آسیای مرکزی (ازبکستان و تاجیکستان) است. مسوولیت حمله موشکی بر ازبکستان را داعش بر‌عهده گرفته بود.

گفتنی است که جماعت انصارالله تاجیکستان تحت تحریم‌های تروریستی سازمان ملل متحد نیز قرار دارد.

این در حالی است که داعش مسئولیت حمله به تاجیکستان را هم به عهده گرفت.