تهدید لفظی یک فرمانده طالبان: تاجیکستان را تسخیر می‌کنیم

یکی از فرماندهان طالبان در اظهاراتی تهدیدآمیز مدعی شد که اگر تاجیکستان از مداخله در امور داخلی افغانستان دست نکشد، آنان می‌توانند این کشور را در یک هفته تسخیر کنند.

به گزارش  رادیو دری، «ملا جان‌محمد حمزه»  مشهور به «ملاجانو» معاون سپاه 217 «عمری» طالبان در «تخار»  در حضور وزیر امر به معروف و نهی از منکر طالبان به تاجیکستان هشدار داد که اگر از مداخله در امور داخلی افغانستان دست نکشد و روسیه پشت «دوشنبه» قرار نگیرد، نیروهای طالبان این کشور را در مدت یک هفته تسخیر می‌کنند.

هنوز هیچ واکنشی از سوی مقامات تاجیکستان به اظهارات ملا جان‌محمد حمزه صورت نگرفته است.

این اولین بار نیست که افراد نزدیک به طالبان به تاجیکستان هشدار می‌دهند که در امور داخلی افغانستان مداخله نکند.

پیش از این «گلبدین حکمتیار»رئیس حزب اسلامی افغانستان گفته بود تاجیکستان «با پناه دادن به مخالفان افغان» به افغانستان اعلام جنگ کرده است.

با این حال، «ذبیح‌الله مجاهد» سخنگوی طالبان بارها اعلام کرده است که حکومت این گروه، اجازه حمله به کشورهای همسایه افغانستان را نخواهد داد.
تاجیکستان از زمان روی کار آمدن حکومت طالبان با آنان ارتباطی نداشته و همواره از ایجاد حکومت فراگیر با حضور نمایندگان تمامی اقلیت‌های قومی و رعایت حقوق بشر دفاع کرده است.

به نظر می‌رسد که منظور نمایندگان طالبان از مفهوم «دخالت در امور داخلی افغانستان»،همین موضع مقامات تاجیکستان است.

واکنش رسانه افغان به هشدار تاجیکستان درباره طالبان

نگرانی مقامات تاجیک از ساخت برج های مراقبتی در مرز افغانستان و تاجیکستان