تاجیکستان با پذیرش دیپلمات طالبان در سفارت کابل موافقت کرد

منابع آگاه می گویند: دولت تاجیکستان با پذیرش یک دیپلمات طالبان در سفارت افغانستان در دوشنبه موافقت کرده است.

به گزارش رادیو دری؛ این منابع همچنین گفته‌اند: وزارت خارجه تاجیکستان به «ظاهر اغبر» سفیر افغانستان نیز تفهیم کرده است که امور سفارت کابل را با همکاری دیپلمات طالبان به پیش ببرد.

دولت تاجیکستان یا طالبان تاکنون دراین‌باره اظهار نظری نکرده‌ اند.

این در حالی است که پیش از این سفارت افغانستان در دوشنبه امور خود را در هماهنگی با «امرالله صالح» معاون اول رئیس‌جمهوری سابق پیش می‌برد و دولت دوشنبه نیز از پذیرش دیپلمات طالبان سر باز زده بود.

ماه عقرب سال گذشته،  امیرخان متقی وزیر خارجه گروه طالبان در نامه ای خطاب به سفارت افغانستان در دوشنبه، فردی به نام «فیض الله» را به عنوان منشی اول هیأت دیپلماتیک طالبان در تاجیکستان معرفی کرده بود.

محمد ظاهر اغبر سفیر دولت پیشین افغانستان در پی دریافت این نامه، آن  را در برابر دوربین خبرنگاران پاره کرده و گفته بود که تا برقراری یک حکومت عادل و فراگیر از سفارت افغانستان نگهبانی خواهد کرد.

پس از روی کار آمدن طالبان، شماری از مخالفان این گروه به تاجیکستان گریختند و روابط تاجیکستان و افغانستان نیز به تیرگی گرایید.

در سه سال گذشته تاجیکستان بارها درباره تهدیدات امنیتی از خاک افغانستان ابراز نگرانی کرده بود.

موضوعی که هر بار با واکنش طالبان رو به رو شده بود که این نگرانی‌ها را بی‌اساس می دانستند.

سفیر دولت پیشین افغانستان در دوشنبه نامه امیرخان متقی را مقابل دوربین‌ها پاره کرد

دیدگاه های تاجیکستان در مورد افغانستان به دیدگاه های ایران نزدیک شده است