تاجیکستان روند اخراج مهاجران افغانستانی را تشدید کرده است

نیروهای امنیتی تاجیکستان شماری از پناهجویان افغانستانی دارای کارت‌ شناسایی معتبر پناهندگی را از این کشور اخراج کردند.

به گزارش رادیو دری؛  منابع محلی در شهر «وحدت» تاجیکستان به رسانه‌ها گفته‌اند که نیروهای امنیتی این کشور روز دوشنبه ۴۷ پناهجوی افغانستانی را که از کمیساریای عالی سازمان ملل، مدارک معتبر پناهندگی دریافت کرده بودند، از تاجیکستان بیرون رانده اند.

به گفته این منابع، شماری از این پناهجویان به مقر امنیتی شهر وحدت فراخوانده شدند و در آنجا پس از ضبط مدارک این افراد، آنها را با دو خودرو به مرز منتقل کرده اند.

همچنین، تعدادی دیگر از پناهجویان در سطح شهر به دست نیروهای امنیتی تاجیکستان بازداشت و به افغانستان بازگردانده شده اند.

گفته می شود بیشتر این افراد، رانندگان و مالکان خودروهای تاکسی در شهر وحدت بوده اند.

شهر وحدت که در 20 کیلومتری شرق دوشنبه واقع شده، تنها منطقه‌ای است که دولت تاجیکستان در آنجا به پناهجویان افغان، اجازه اقامت داده است.

رسانه های افغانستانی اخیرا از تشدید روند اخراج‌ پناهجویان افغان از تاجیکستان خبر داده اند.

تاکنون نهادهای بین‌المللی، از جمله کمیساریای عالی پناهندگان سازمان ملل واکنشی به این رویدادها نشان نداده است.

سازمان ملل: تاجیکستان باید اخراج پناهجویان افغانستانی را متوقف کند

نامه فعالان حقوق بشر به رحمان: تاجیکستان اخراج پناهجویان افغان را متوقف کند