گزارش‌ها از دیدار هیأت تاجیکستان با رئیس استخبارات طالبان

برخی رسانه‌ها از دیدار هیأت تاجیکستان که به کابل سفر کرده است با رئیس استخبارات طالبان خبر می‌دهند.

به گزارش رادیو دری، هیأت ۱۴ نفری تاجیکستان که از چهار روز به‌این‌سو در کابل حضور دارد افزون بر دیدار با وزیران حکومت طالبان، با رئیس الوزرا و رئیس استخبارات آنان نیز دیدار و گفت‌وگو کرده است.

طالبان تاکنون جزئیات این دو گفت‌وگو را همگانی نساخته‌اند.

این هیأت پیش از این با وزیران خارجه و امور سرحدات طالبان دیدار کرده است.

این دو وزارت در خبرنامه‌های جداگانه گفته‌اند که در این دیدارها درباره امنیت، توسعه روابط دوجانبه، چالش‌های مرزی، قاچاق مواد مخدر و تثبیت مرز افغانستان و تاجیکستان گفت وگو شده است.

این نخستین سفر یک هیأت از تاجیکستان به کابل در بیش از چهار سال حاکمیت دوباره طالبان در افغانستان است.

هیأت ۱۴ نفری تاجیکستان، مقام‌های امنیتی، اطلاعات و وزارت خارجه این کشور به‌شمول فرستاده ویژه تاجیکستان برای افغانستان را شامل می‌شود.

تا کنون کشورهای آسیای مرکزی به جز تاجیکستان با حکومت طالبان روابط نزدیک برقرار کرده اند.

طالبان و تاجیکستان در حفظ آرامش و ثبات در مرزهای مشترک همکاری می‌کنند