تجلیل از نود و نهمین سالروز استقلال افغانستان
امروز ۲۸ اسد، نودونهمین سالروز استرداد استقلال افغانستان است و مراسم تجلیل از این روز در کابل و سایر ولایت‌های افغانستان با برنامه‌های مختلف برگزار شده است.
به گزارش خبرنگار رادیو دری، اشرف غنی، رئیس جمهور افغانستان، با گذاشتن اگل در پای منار آزادی در محوطۀ وزارت دفاع این کشور، این مراسم را آغاز کرد.
در مراسم امروز علاوه بر چهره‌های سیاسی - نظامی، حامدکرزی، رئیس جمهور پیشین افغانستان، ژنرال عبدالرشید دوستم، معاون اول رئیس جمهور، محمدحنیف اتمر، مشاور امنیت ملی، عبدالله عبدالله، رئیس اجرائیه و محمد محقق معاون وی، شاهدخت هندیه، دختر غازی امان‌الله خان نیز حضور داشت.
در این روز جاده‌های مرکزی شهر کابل و سایر شهرهای بزرگ شاهد تدابیر جدی امنیتی اتخاذ شده است.
پرچم‌های سه‌رنگ در جاده‌ها، بر سر مغازه‌ها و وسایط شهروندان در شهر کابل به چشم می‌خورد.
شهروندان افغان، با برنامه‌های مختلف فرهنگی – ادبی از سالروز استرداد استقلال کشور شان، تجلیل می‌کنند.
شهر جلال‌آباد ولایت ننگرهار، جایی که مقبره‌های امان‌الله خان، بانی استقلال افغانستان و ملکه ثریا خانم وی، هست، شاهد برنامه‌های مختلف جشن و پایکوبی است.
۹۹ سال قبل از امروز، غازی امان‌الله خان، پادشاه وقت افغانستان، در ۲۸ اسد سال ۱۲۹۸ خورشیدی، روز استقلال کشور را از انگلستان اعلام کرد.