Փաշինյանի հետ չենք էլ ուզում հանդիպենք. անհայտ կորածների բարեկամները կառավարության մոտ են

Զինծառայողների հարազատների նյարդերը հասկանալիորեն լարված են, լրագրողների հետ պարբերաբար վիճաբանություններ են տեղի ունենում։

Անհայտ կորած զինծառայողների հարազատները շարունակում են մնալ կառավարության շենքի դիմաց։ Հայտնել էինք, որ նրանք գիշերել են կառավարության դիմաց։

Այս ընթացքում նրանցից երկու խումբ մտել է կառավարության շենք և հանդիպել է վարչապետի աշխատակազմի ներկայացուցիչների հետ։ Հենց վարչապետ Նիկոլ Փաշինյանի հետ հարազատները չեն հանդիպել։

«Իրա հետ չենք էլ ուզում հանդիպենք», –Sputnik Արմենիայի հետ զրույցում ասում է զինծառայողների հարազատներից մեկը` նկատի ունենալով Փաշինյանին։

Հարցին` այդ դեպքում ո՞րն է պատճառը կառավարության դիմաց հավաքվելու, մեկն ասաց. «Ուղղակի զրույց ենք անում»։

Մեկ այլ հարազատ երկու բառով պատմեց, որ ավելի վաղ մտել են կառավարություն ու շուտով կրկին մտնելու են։

«Բան էլ չասեցին, արդյունք չկա», – կարճ ամփոփեց նա հանդիպումը։

Հավաքվածների նյարդերը հասկանալիորեն լարված են, պարբերաբար լրագրողների հետ վիճաբանություններ են տեղի ունենում։

«Չենք ուզում ոչ մի հարցի պատասխանել, ասելու բան չկա, գնացեք ձեր տեղը կանգնեք, մեզ ոչ նկարեք, ոչ էլ ձայնագրեք», – ասում էին նրանք։ Տեղում աշխատող օպերատորներին արգելեցին իրենց նկարել։

Ավելի վաղ գրել ենք, որ հարազատները հրաժարվում են ընդունել աճյունների ԴՆԹ հետազոտությունների արդյունքները և կարծում են, որ իրենց որդիների հարցը դրվել է «այլ հարթակի վրա»։

armeniasputnik.am