Հայկական կարմիր խաչն ու Իրանի Կարմիր մահիկը կհամագործակցեն․ հուշագիր է ստորագրվել
Հայկական կարմիր խաչն ու Իրանի Կարմիր մահիկն առողջապահական, սոցիալական և մի շարք այլ ոլորտներում համատեղ մարդասիրական ծրագրեր են նախատեսում իրականացնել։ ՀԿԽԸ նախագահ Դավիթ Ներսիսյանը և Իրանի Կարմիր մահիկի նախագահ դոկտոր Փիրհոսեյն Քոլիվանդը համատեղ հուշագիր են ստորագրել։
«Իրանի Կարմիր մահիկի հետ հարաբերություններում նոր շունչ է մտել նախորդ տարվա Լոռու մարզում տեղի ունեցած ջրհեղեղից հետո, երբ նրանք 1 բեռնատար օգնություն էին ուղարկել Հայաստան։ Ունենալով բազմաթիվ հնարավորություններ՝ իրանական Կարմիր մահիկը նաև ցանկություն է հայտնել հայկական Կարմիր խաչի հետ էլ ավելի խորացնել հարաբերությունները։ Ապագայում ավելի պրակտիկ գործողությունների կանցնենք մեր գործընկերների հետ»,- նշեց Ներսիսյանը։
Քոլիվանդն էլ ընդգծեց, որ իրենք պատրաստ են կիսվել սեփական փորձով, իրենց կարողությունները ներդնել հարկ եղած դեպքում։
«Մենք պատրաստակամություն ենք հայտնում մեր հնարավորությունները, կարողությունները և փորձը փոխանակելու համար։ Մեկնարկը տրվեց։ Համագործակցությունը լինելու է ուսումնական ոլորտում, փրկարարական աշխատանքներում և այլ ոլորտներում, որոնք Կարմիր մահիկի լիազորությունների շրջանակում են։ Մեր աշխատանքներում նաև սմարթ հնարավորություններ են օգտագործվում։ Մենք նաև լայն գործունեություն ենք ծավալում ավանդական բժշկության, բուսաբուժության և բժշկական այլ ոլորտներում։ Մյուս ոլորտը, որտեղ կցանկանան գործունեություն ծավալել, բժշկական և առողջապահության ոլորտն է»,- նշեց Իրանի Կարմիր մահիկի նախագահը։
Նա նշեց, որ իրենց կազմակերպությունում մեծ նշանակություն ունի այն, որ մարդկանց համար իրենց օգնությունը հնարավորինս հասանելի լինի։ Իրանի Կարմիր մահիկը գյուղերում և դժվար հասանելի տարածքներում նույնպես կենտրոններ ունի։