Ամիր Աբդոլլահյան. Իրանը ցանկանում է հասնել լավ համաձայնության
Իրանի ԱԳ նախարարը Ֆրանսիայի ԱԳ նախարարի հետ հեռախոսազրույցում ասել է.«Իրանը ցանկանում է լավ համաձայնության հասնել»:
Իրանի ԱԳ նախարար Հոսեյն Ամիր Աբդոլլահյանը և Ֆրանսիայի ԱԳ նախարար Ժան Իվ Լը Դրիանը այսօր հեռախոսազրույց են ունեցել:
Հեռախոսազրույցում երկու երկրների պաշտոնյաները խորհրդակցել են տարբեր հարցերի, այդ թվում երկկողմ հարաբերությունների և առաջիկայում Վիեննայում անցկացվելիք բանակցությունների շուրջ:
Հիշեցնելով ԱՄՆ-ի պատասխանատվությունը ՀԳՀԾ-ի ներկա իրավիճակի կապակցությամբ, և ԱՄՆ-ի մաքսիմալիստական պահանջների նկատմամբ երեք եվրոպական երկրների պահած լռության դերը, Իրանի արտգործնախարարը հավելել է. «Իրանը ցանկանում է լավ համաձայնության հասնել, ինչը պահանջում է, որպեսզի ՀԳՀԾ-ն ստորագրած բոլոր կողմերը վերադառնան իրենց պարտավորություններին և չեղյալ հայտարարվեն հակաիրանական պատժամիջոցները»:
Անդրադառնալով Իրանի դեմ սահմանված ամերիկյան նոր պատժամիջոցներին, նախարար Ամիր Աբդոլլահյանն այս քայլն անվանել է ԱՄՆ-ի նկատմամբ Իսլամական Հանրապետության շարունակական անվստահության հաստատում և ընդգծել է երաշխիքներ տրամադրելու և արդյունավետ ստուգումներ իրականացնելու անհրաժեշտությունը։
Նշելով, որ Իրանի պաշտպանական ծրագիրը ցանկացած երկրի ինքնիշխանության իրավունքն է, Ամիր Աբդոլլահյանը հավելել է, «Ուշադրություն չդարձնելով ԱՄՆ-ի ոչ կառուցողական պատժամիջոցային քաղաքականությանը, մենք կշարունակենք ուժեղացնել Իրանի պաշտպանական կարողությունը»։
Նշելով, որ Ատոմային էներգիայի միջազգային գործակալությունը պետք է զերծ մնա քաղաքականացված քայլերից, Իրանի արտգործնախարարն ընդգծել է այդ կառույցի հետ Իրանի տեխնիկական համագործակցությունը շարունակելու անհրաժեշտությունը:
